नेपाली कांग्रेसका महामन्त्री तथा पूर्वस्वास्थ्य मन्त्री प्रदीप पौडेलले कैलालीस्थित गेटा अस्पताललाई ३ सय बेडमा स्तरउन्नति गरेपछि विश्वविद्यालय सञ्चालन गर्नु व्यवहारिक हुने बताएका छन्।
आफू स्वास्थ्य मन्त्री हुँदा अस्पताल सञ्चालन र एमबिबिएस पठनपाठनका लागि बजेटमा स्रोत सुनिश्चितता गरेको उनले स्मरण गरेका छन्।
‘गेटा अस्पताललाई तत्काल ३ सय बेडमा स्तरोन्नति गरी सञ्चालनमा ल्याउनु नै सुल्टो र व्यावहारिक बाटो हो,’ उनले आज सामाजिक सञ्जाल फेसबुकमा लेखेका छन्।
यस्तो छ पूर्वस्वास्थ्य मन्त्री पौडेलको भनाइ-
दशरथ चन्द स्वास्थ्य विज्ञान विश्वविद्यालय सञ्चालनका लागि सर्वप्रथम गेटा अस्पताललाई कम्तीमा ३ सय बेडको क्षमतामा सञ्चालन गर्नु अनिवार्य छ। प्रदेश सरकारले पूर्वस्वीकृति दिइसकेको सेती प्रादेशिक अस्पताललाई यसमा गाभेर स्वास्थ्य मन्त्रालयकै जनशक्ति परिचालन गर्ने हो भने अत्यन्त न्यून लागतमा यो काम सम्पन्न गर्न सकिन्छ।
हिजो, म स्वास्थ्य तथा जनसंख्या मन्त्रालयको जिम्मेवारी रहँदा गेटा अस्पताल सञ्चालन गर्न तथा एमबीबीएस पठनपाठन सुरू गर्नका लागि आर्थिक वर्ष २०८२/०८३ को बजेटमा नै स्रोत सुनिश्चितता गरेका थियौँ। त्यतिबेला पनि स्थानीयवासीको आवरणमा केही पक्षबाट वस्तुस्थिति नबुझी विरोध भयो; तथापि अस्पतालको क्षमता अभिवृद्धि गरी शैक्षिक कार्यक्रम सञ्चालन गर्न हाम्रो पूर्ण तयारी थियो।
हाल डा. गोविन्द केसीले अस्पताल शीघ्र सञ्चालनको माग राखी सुरू गर्नुभएको सत्याग्रह अन्ततः दशरथ चन्द स्वास्थ्य विज्ञान विश्वविद्यालयकै सुदृढीकरणका पक्षमा छ। तर पुनः विभिन्न बहाना बनाएर विश्वविद्यालयको मेरुदण्ड मानिएको अस्पतालको क्षमता अभिवृद्धि र सञ्चालन प्रक्रियामा अवरोध पुर्याउने खेल भइरहेको देखिन्छ।
गेटा अस्पताललाई तत्काल ३ सय बेडमा स्तरोन्नति गरी सञ्चालनमा ल्याउनु नै सुल्टो र व्यावहारिक बाटो हो। यसो नगरीकन न त विश्वविद्यालयको औचित्य पुष्टि हुन्छ, न त एमबीबीएसको पठनपाठन नै सुरू हुन सक्छ।
