सुनसरीको कप्तानगन्ज घटनामा ज्यान गुमाएका दुई युवकको शव पाँचौं दिन शुक्रबार आफन्तले बुझेर अन्त्येष्टि गरेका छन्।
गृह मन्त्रालयसँगको ७ बुँदे सहमतिपछि आफन्तहरू शव बुझ्न तयार भएका हुन्।
गत आइतबार राति स्थानीय दुई समूहबीच भएको विवाद नियन्त्रणमा लिन प्रहरीले चलाएको गोली लागेर देवानगन्ज–४ का २५ वर्षीय ओमप्रकाश मेहताको घटनास्थलमै मृत्यु भएको थियो। त्यस्तै, देवानगन्ज–३ का २२ वर्षीय जयप्रकाश मेहताको उपचार क्रममा बिहीबार विराटनगरस्थित न्युरो अस्पतालमा मृत्यु भएको थियो।
घटनामा गोली लागेर घाइते भएका अन्य ६ जनाको विराटनगरका विभिन्न अस्पतालमा र दुई जनाको काठमाडौंमा उपचार भइरहेको छ।
गृहमन्त्री सुधन गुरूङको उपस्थितिमा बिहीबार रातभर भएको वार्तापछि शुक्रबार बिहान ७ बुँदे सहमतिपत्रमा हस्ताक्षर भएको हो। सहमति अनुसार मृतकका परिवारलाई जनही १०–१० लाख रूपैयाँ राहत उपलब्ध गराइने, मृतकलाई सहिद घोषणा गर्ने, घटनाको निष्पक्ष छानबिन गरी दोषीलाई कारबाही गर्ने, परिवारका एक सदस्यलाई रोजगार दिने र उनीहरूको स्मृतिमा पार्क निर्माण गर्ने उल्लेख छ।
बिहान सहमति भए पनि दिउँसो केही स्थानीयले 'उधारो सहमति' भन्दै शव बुझ्न अस्वीकार गरेपछि केही समय अन्योल सिर्जना भएको थियो। पछि स्थानीय प्रशासनले गृहमन्त्री स्वयंको रोहवरमा भएको सहमति कार्यान्वयन हुने विश्वास दिलाएपछि कोशी अस्पतालमा पोस्टमर्टम गरिएका शव आफन्तले बुझेर दाहसंस्कार गरेका हुन्।
गाउँमा शोक र त्रास, सामाजिक सद्भावमा धक्का
घटनापछि देवानगन्ज गाउँपालिकामा शोक, अन्योल र त्रासको वातावरण अझै कायम छ।
गाउँपालिका उपाध्यक्ष कुमारी बिभा यादवका अनुसार ठूलो संख्यामा सेना र प्रहरी परिचालन गरिएको छ भने सुरक्षाका लागि कर्फ्यु जारी राखिएको छ।
वर्षौंदेखि मिलेर बसेका दुई समुदायबीच यो घटनाले अविश्वास बढाएको उपाध्यक्ष यादवले बताइन्।
'हिजोसम्म जातीय वा धार्मिक विभेदबिना सबै मिलेर बसेका थियौं। यो घटनाले सामाजिक सम्बन्धमा गम्भीर असर पुर्याएको छ,' उनले भनिन्, 'सम्बन्ध पुरानै लयमा फर्काउन समय लाग्छ। अहिलेको स्थिति चुँडिएको धागोजस्तै छ, जसलाई जोड्न दुवै पक्ष लचिलो भएर सहकार्यमा आउनुपर्छ।'
स्थानीय सामाजिक अगुवा रामनारायण मेहताले पनि गाउँमा दीर्घकालीन शान्तिका लागि राज्यले अविलम्ब दोषीमाथि कारबाही गर्नुपर्ने बताए।
'हामी यहीँ बसेर जीवन बिताउनुपर्छ। त्यसैले मिलेर बस्नुको विकल्प छैन, तर त्यसका लागि राज्यले शान्ति–सुरक्षाको ठोस वातावरण बनाउनुपर्छ,' उनले भने।
जिल्ला प्रहरी कार्यालय सुनसरीका प्रवक्ता तथा डिएसपी चन्द्रबहादुर खड्काले सरकारसँगको सहमतिपछि स्थिति नियन्त्रणमा आए पनि दुवै पक्षमा शंका र त्रास अझै बाँकी रहेको जानकारी दिए।
स्थिति मूल्यांकन गर्दै कर्फ्यु हटाउने वा नहटाउने विषयमा थप निर्णय लिइने डिएसपी खड्काले बताए।
