नेपाली कांग्रेसका सभापति गगनकुमार थापाले राजनीतिलाई सत्ता र शक्तिको संकुचित घेराबाट बाहिर निकालेर जनसेवाको मुख्य माध्यम बनाउनुपर्ने बताएका छन्।
शनिबार पार्टी केन्द्रीय कार्यालयमा आयोजित एक कार्यक्रममा बोल्दै उनले राजनीतिमा बढ्दै गएको पद र शक्तिको आशक्तिप्रति चिन्ता व्यक्त गरे।
नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानद्वारा आयोजित ‘विपद पूर्वतयारी तथा प्रतिकार्य प्रशिक्षण’ कार्यक्रमको उद्घाटन गर्दै सभापति थापाले राजनीतिलाई सबैभन्दा ठूलो सार्वजनिक र मानव सेवाको क्षेत्रका रूपमा परिभाषित गरे।
नागरिक सेवा र मानव सेवाका लागि शक्ति र सत्तालाई साधन बनाउनुपर्नेमा केवल सत्ता प्राप्तिकै लागि मात्र राजनीति गर्ने अवस्थामा पुग्नु दुःखको विषय भएको उनको भनाइ छ।
यो राजनीतिको उद्देश्यभन्दा फरक र विचलित बाटो भएको उनले बताए।
पार्टीको ऐतिहासिक पृष्ठभूमि स्मरण गर्दै उनले संस्थापक नेताहरूले सत्ता वा शक्तिको अभिलाषा राखेर नभई विशुद्ध नागरिक सेवाको भावनाले पार्टी स्थापना गरेको उल्लेख गरे।
बदलिँदो परिवेशमा पार्टीका सामु नयाँ विषय र चुनौतीहरू थपिएको बताउँदै उहाँले सांगठनिक सुदृढीकरण र नीतिगत स्पष्टतालाई सँगसँगै लैजानुपर्ने आवश्यकता औंल्याए।
सभापति थापाले भने, ‘हामी राजनीतिमा आएको पनि त्यही भएर हो। राजनीतिभन्दा ठूलो सार्वजनिक सेवा अरू केही छैन। राजनीतिभन्दा ठूलो नागरिक सेवा वा मानव सेवा पनि केही होइन। नागरिक र मानव सेवा गर्न शक्ति भयो भने अझ धेरै गर्न सकिन्छ, सत्ता भयो भने अझ प्रभावकारी रूपमा गर्न सकिन्छ भन्ने सोचबाट हामी चिप्लिएर शक्ति र सत्ताकै लागि राजनीति गर्ने ठाउँमा पुग्यौँ। तर यो पार्टी स्थापना गर्ने संस्थापक नेताहरूले सुरूदेखि सत्ता र शक्तिलाई लक्ष्य बनाएका थिएनन्।’
उनले अगाडि भने, ‘यो पार्टी नागरिक सेवा र मानव सेवाकै भावनाबाट प्रारम्भ भएको हो। आज पार्टी नयाँ चरणमा आइपुगेको छ। नयाँ विषय छन्, नयाँ चुनौतीहरू छन्। म प्रतिष्ठानप्रति हार्दिक आभार व्यक्त गर्न चाहन्छु। यसले विषयवस्तुलाई जसरी पक्रेको छ र अत्यन्त व्यवस्थित ढङ्गले कार्यक्रम सञ्चालन गरिरहेको छ, त्यो प्रशंसनीय छ। हामी पार्टीका नियमित संगठनात्मक काम गर्दै जान्छौँ। त्यससँगै पार्टीको आत्मालाई जीवन्त राख्ने यस्ता वैचारिक र सामाजिक कार्यहरू पनि निरन्तर अघि बढाउँदै जानुपर्छ।’
प्रतिष्ठानको कार्यशैलीप्रति सन्तोष व्यक्त गर्दै उनले पार्टीको मर्म र आत्मालाई बुझेर रचनात्मक कार्यहरू भइरहेको बताए।
एकातर्फ नियमित सांगठनिक गतिविधि र अर्कोतर्फ नीतिगत तथा प्रशिक्षणका कामहरू व्यवस्थित ढंगले अगाडि बढ्नु सुखद् पक्ष रहेको उनको भनाइ छ। –न्युज एजेन्सी नेपाल
