धादिङको गल्छी गाउँपालिका वडा नम्बर ६ का अध्यक्ष दीपककुमार कार्कीले बाढी प्रभावितको उद्धार तथा राहतमा आफ्नै स्रोतबाट काम गरिरहेको बताएका छन्।
संघीय सरकार र सांसदबाट हालसम्म कुनै आर्थिक सहयोग प्राप्त नभएको उनको भनाइ छ।
वडाध्यक्ष कार्कीका अनुसार बाढी आएको दिन भदौ १० गते त्रिशूलीमा पानीको सतह नघट्दै दिउँसो २ बजे कार्यपालिका बैठक बसेर क्षतिग्रस्त घरलाई तत्काल १० हजार रुपैयाँका दरले राहत दिने निर्णय गरिएको थियो।
कठिन परिस्थितिका बीच पनि भदौ ११ गते बिहान ११ बजेसम्म प्रभावित घरहरूको विवरण तयार पारेर बेलुकी ११ बजेदेखि राहत वितरण सुरू गरिएको उनले बताए।
‘बाँकी रहेका घरका लागि बिहानैदेखि आर्थिक सहयोग बाँडिरहेका थियौँ। त्यही बेला फेरि बाढीको सूचना आयो। त्यसपछि भागाभाग भयो र करिब चार–पाँच घण्टा काम प्रभावित भयो,’ कार्कीले भने, ‘हामी दुई रातदेखि सुत्न पाएका थिएनौं। खानाको त कुरै छोडौं। त्यस्तो अवस्थामा आएर हप्काएर आदेशको शैलीमा राहत नबाँडेको र लापरबाही गरेको भनेर माननीयज्यूले भन्नुभयो। हामीलाई त्यो अपाच्य लाग्यो र जबाफ मात्र दिएका हौं।’
शनिबार धादिङ क्षेत्र नम्बर १ बाट निर्वाचित सांसद आशिका तामाङ र वडाध्यक्ष कार्कीबीच राहत वितरणको विषयलाई लिएर चर्काचर्कीसमेत भएको थियो। बाढी प्रभावितलाई तत्कालका लागि विस्कुट, चाउचाउलगायत वितरण गरिएको कार्कीले बताए।
राहत तथा उद्धारका लागि स्थानीय तहले आफ्नै स्रोत र दाताहरूको सहयोगमा काम गर्नुपरेको उनको भनाइ छ।
'आज १५ गते हामी कुरा गरिरहेका छौं, दिउँसो १ बज्न लागिसक्यो। संघीय सरकार र माननीयज्यूबाट एक रुपैयाँ पनि राहत पाएका छैनौं,' उनले भने, 'डोनर र आफ्नै स्रोतबाट काम गरिरहेका छौं। सहकारीबाट ऋण लिएरसमेत काम गरिरहेका छौं।'
कार्कीका अनुसार वडामा करिब १२० घर बाढीबाट प्रभावित भएका छन्। बाढी आउनुअघि नै माइकिङ गरेर स्थानीयलाई सचेत गराइएकाले मानवीय क्षति हुनबाट जोगिएको उनले बताए।
यद्यपि, केही पशुचौपाया मरेको छ भने अधिकांश प्रभावितले घरबाट सामानसमेत निकाल्न नपाएको उनको भनाइ छ। 'कतिपय मानिस भाग्दा चप्पलसमेत लगाउन पाएनन्। सामान निकाल्ने अवस्था नै थिएन,' कार्कीले भने।
-1788165288.jpg)
