भोटेकोशी नदीमा भदौ १० मा आएको बाढीका कारण ज्यान गुमाएकाहरूप्रति श्रद्धाञ्जली अर्पण गर्न प्रतिनिधि सभा बैठकले विशेष प्रस्ताव पारित गर्ने भएको छ।
प्रस्ताव पारित गर्न बुधबार १ बजेका लागि बैठक डाकिएको छ।
बैठकमा सांसदहरूले भोटेकोशी बाढीका कारण भएको क्षति, उद्धार तथा राहतको कार्यबारे धारणा राख्नेछन्।
प्रतिनिधि सभाको कार्यव्यवस्था एवं परामर्श समितिको बैठकमा विशेष प्रस्ताव पारित गर्ने सहमति भएको संघीय संसद सचिवालयका प्रवक्ता एकराम गिरीले जानकारी दिए।
२०७२ साल वैशाख १२ गते भूकम्प गएपछि वैशाख २४ गतेको बैठकबाट विशेष शोक प्रस्ताव पारित गरिएको थियो।
बैठकमा नेपाली कम्युनिष्ट पार्टीका युवराज दुलालले बाढी प्रभावित क्षेत्रको अनुगमन र सरकारको कामको मूल्याङ्कनका लागि विशेष संसदीय समिति गठन गर्नुपर्ने धारणा राखेका थिए। तर संसदीय समिति गठनबारे कुनै निर्णय भने भएन।
रास्वपा महामन्त्रीसमेत रहेका सांसद विपिनकुमार आचार्यले सर्वदलीय बैठकपछि समिति गठनबारे थप छलफल गर्न प्रस्ताव गरेका थिए।
बैठकमा सांसदहरूको तलबबाट कति रकम प्रधानमन्त्री राहत तथा उद्धार कोषमा जम्मा गर्ने भन्ने विषयमा पनि छलफल भएको थियो।
तर प्रमुख प्रतिपक्षी नेपाली कांग्रेसले आफ्नो संसदीय दलले कम्तिमा १५ दिनको तलब बराबर सहयोग गर्ने निर्णय गरिसेकको जानकारी दिएका थिएको थियो।
नेकपा एमालेका प्रमुख सचेतक ऐन महरले पनि आफ्नो दलले निर्णय गर्ने चरणमा रहेको उल्लेख गर्दै दलीय आधारमा नै निर्णय गर्नु उपयुक्त हुने बताएका थिए। त्यसपछि दलीय आधारमा नै निर्णय गर्ने सहमति भएको थियो।
रास्वपा सचेतक प्रकाशचन्द्र परियारका अनुसार प्रतिनिधि सभाको बैठक भदौ १७ र १८ गते दुई दिन बस्नेछ।
त्यसपछि आउँदो भदौ २३ गते बस्ने सम्भावना छ।
भदौ २२ गते बाढीका कारण ज्यान गुमाएकाहरुको १३ दिन पुग्ने भएकाले उक्त दिन सरकारले राष्ट्रिय शोक घोषणा गर्न सक्ने सम्भावना छ।
कार्यव्यवस्था समितिको बैठकमा रास्वपा मुख्य सचेतक कबिन्द्र बुर्लाकोटीले सरकारले भदौ २२ गते सार्वजनिक बिदा दिने गरी शोक मनाउन लागेको बैठकमा जानकारी दिएका थिए।
बाढीमा परेर अहिलेसम्म ९८७ जनाको निधन भइसकेको छ भने ३ हजार ९ सय १६ जना सम्पर्कविहीन छन्।
