गृहमन्त्री सुधन गुरूङले स्थानीय सरकारले बाढी प्रभावित क्षेत्रमा सक्रियतापूर्वक काम गरिराखेको बताएका छन्।
वडा र गाउँ-नगरले आफ्नो जिम्मेवारीअनुसार काम गरिराखेको गृहमन्त्री गुरूङको भनाइ छ।
उनले उदाहरण दिँदै भने, ‘नुवाकोटको बिदुर नगरपालिका प्रमुख पनि मसँग सँगै रहेर काम गरिराख्नुभएको थियो। कति जनाले नदेख्नु भएको जस्तो लाग्यो, स्थानीय पालिकाले संघीय सरकारसँग मिलेर काम गरेको छैन भन्ने लागेको होला। तर स्थानीय तहहरू हामीसँग सक्रिय रहेर नै काम गरिराख्नुभएको छ। कतिपय ठाउँमा उहाँहरू आफै पनि पीडामा हुनुहुन्छ। कति जना वडाध्यक्ष हुनुहुन्छ कि हुनुहुन्न पनि तथ्यांक आइसकेको अवस्था छैन।’
राष्ट्रिय विपद् जोखिम न्यूनीकरण तथा व्यवस्थापन प्राधिकरणले भदौ १० को भोटेकोशी-त्रिशूली बाढीपछिका अवस्थाबारे जानकारी दिन आज गरेको पत्रकार सम्मेलनमा बोल्दै गृहमन्त्री गुरूङले सबै तहका सरकारहरू मिलेर काम गरिराखेको बताएका हुन्।
‘संघीय, प्रदेश र स्थानीय सरकारले आफ्नो जिम्मेवारीअनुसार सक्ने प्रयास गरिराखेका छौं भन्ने लाग्छ, मैले जे देखेँ त्यही कुरा राखेको हुँ,’ उनले भने।
उनले राहत वितरणमा एकद्वार प्रणाली लागू नगरिएको बताए।
‘राहत वितरण नागरिकहरू आफै गएर गर्न सक्नुहुन्छ, कति ठाउँमा बाटो नभएको अवस्था पनि छ। त्यस्तो ठाउँमा राहत वितरण गरिएको छ, विभिन्न संघसंस्थाले दिएका राहत पनि वितरण गरिएका छन्,’ उनले भने, ‘सुरूदेखि नै वडा र पालिकालाई जिम्मेवार बनाएर राहत वितरण गरिएको छ।’
उनले आफू बाढी प्रभावित धेरै ठाउँहरू पुगेको पनि बताए।
‘कतिपय ठाउँमा जमिन दलदलको अवस्था छ। १० फिट, २० फिटको दलदल,’ उनले भने, ‘यो बाढीले केही कुरा बाँकी राखेको छैन। यसले गरेको क्षति कल्पना पनि गर्न सकिन्न। कतिपय ठाउँमा पहाड नै फुटाएको छ।’
उनले सुरूङ भित्रको उद्धारमा सुरूदेखि नै सरकार लागेको तर सुरूङभित्र पनि दलदल अवस्था रहेको बताए। कतिपय ठाउँमा दलदल अवस्थाले गर्दा हेलिकप्टर पनि अवतरण गर्न नसक्ने र सामान पनि लैजान गाह्रो हुने अवस्था रहेको उनको भनाइ छ।
‘विभिन्न टनेलमा ड्रोन पनि पठाइएको छ। अझै पनि प्रयास जारी छ, सुरूङभित्रको उद्धारलाई,’ उनले भने, ‘अझै आशा बाँकी नै छ। सुरूङभित्र रहेका मानिस त्यहीँको पानी खाएर रहनुभएको छ कि भन्ने आशा छ। सुरक्षा संयन्त्रले अहिले पनि सुरूङ क्षेत्रमा काम गरिराखेको छ।’
