सुरूङभित्र फसेका मानिसहरूको उद्धार गर्न सरकारले ढिलाइ गरेको नेपाली कांग्रेसले बताएको छ।
भदौ १० गते भोटेकोशी-त्रिशूली बाढी गएको थियो।
भोटेकोशी बाढी पश्चातको उद्धार, राहत र पुनर्स्थापना सम्बन्धमा नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानको बैठकले सुरूङभित्र फसेका मानिसहरूको उद्धारमा सरकारले ढिलाइ गरेको निष्कर्ष निकालेको छ।
सुरूङभित्र फसेकाहरूको उद्वारमा सरकारले प्रकट गरेको 'अदूरदर्शिता र अकर्मण्यता'प्रति बैठकले गम्भीर रोष प्रकट गरेको हो।
उद्वारको कार्यमा अहोरात्र खटेका नेपाली सेना, जनपद प्रहरी, सशस्त्र प्रहरी लगायत अन्य प्रशासनिक निकायको भुमिकाप्रति बैठकले सह्राहना र सम्मान प्रकट पनि गरेको छ।
उपसभापति विश्वप्रकाश शर्मा प्रमुख रहेको प्रतिष्ठानले भनेको छ, ‘सुरूङभित्र कयौं होनहार इञ्जिनियर र मेहनती श्रमिकहरू फसेको संवदेशनशील खबरसँग पूरै संसार सुसूचित थियो। हाम्रो क्षमता र विज्ञताले भ्याउन नसक्दा तत्कालै संसारको पल्लो कुनाबाट विज्ञ सहयोग लिएर शुरुवाति २/३ दिनभित्र त्यहाँ फसेकाहरूको उद्धार गर्नु जिम्मेवार सरकारको कर्तव्य थियो तर अन्तर्राष्ट्रिय सहयोग लिन नचाहने, लिन ढिलाइ गर्ने अनि जलविद्युत आयोजनाका प्रवद्र्धक निर्माण कम्पनीहरूलाई पनि समयमै उद्वारको अनुमति नदिने जे व्यवहार सरकारले गर्यो, यो गलत मात्र होइन, अन्ततः अमानवीय प्रमाणित हुँदैछ।’
प्रतिष्ठानको बैठकले सुरूङभित्रबाट अविलम्ब उद्वार र उचित निकासका लागि सरकार समक्ष मागसमेत गरेको छ।
