नेपाली कांग्रेसको १५औँ महाधिवेशनमा महाधिवेशन प्रतिनिधि विश्वदीप लामिछानेले केन्द्रीय सदस्य (पेसागत विषय विज्ञ) पदमा उम्मेदवारी घोषणा गरेका छन्।
लामिछानेले पार्टी संगठनलाई आधुनिक प्रविधिसँग जोड्दै डिजिटल र प्रविधिमैत्री कांग्रेस बनाउने योजना अघि सारेका छन्।
‘अनुभव, क्षमता र प्रविधिको सङ्गम : समावेशी कांग्रेस, समृद्ध नेपाल’ भन्ने नारासहित उम्मेदवारी दिएका लामिछानेले पार्टीको आन्तरिक संगठन, कार्यकर्ता र आम नागरिकबीचको सम्बन्धलाई प्रविधिमार्फत थप प्रभावकारी बनाउनुपर्ने बताएका छन्।
मिडिया, ब्रान्डिङ र प्रविधिको क्षेत्रमा लामो अनुभव रहेको लामिछाने केन्द्रीय नीति, अनुसन्धान तथा प्रशिक्षण प्रतिष्ठानमा रहेर पनि काम गरेका थिए।
उनले कान्तिपुरलगायत टेलिभिजनमा व्यवस्थापकीय जिम्मेवारीसमेत सम्हालेका छन्। भिजुअल इफेक्ट्सतर्फ ‘इसेज अवार्ड २००८’ प्राप्त गरेका लामिछाने डिजाइन, एनिमेसन र आर्टिफिसियल इन्टेलिजेन्स क्षेत्रमा समेत दक्ष रहेको बताइन्छ।
लामिछानेले वडा तहदेखि केन्द्रसम्म पार्टीको सूचना प्रणालीलाई व्यवस्थित र दुईतर्फी बनाउन डिजिटल टोली निर्माण गर्ने योजना अघि सारेका छन्। उनका अनुसार प्रविधिको प्रयोगले कार्यकर्तालाई पार्टीका नीति, प्रशिक्षण र आवश्यक सूचनामा सहज पहुँच पुर्याउन सकिनेछ।
उनको योजनामा पार्टीको प्रचारप्रसारलाई पनि नयाँ ढङ्गले अघि बढाउने उल्लेख छ। एउटै आधिकारिक स्रोतबाट तयार हुने सामग्रीलाई AI को सहयोगमा विभिन्न ढाँचा र भाषामा रूपान्तरण गरी नागरिकसम्म पुर्याउने उनको प्रस्ताव छ।
त्यस्तै, प्रतिवेदनको सार निकाल्ने, दस्ताबेज तयार गर्ने र दोहोरिने प्रकृतिका काममा AI प्रयोग गरेर समय बचत गर्न सकिने लामिछानेको भनाइ छ। यसबाट पार्टीका नेता तथा कार्यकर्तालाई बढी समय जनसम्पर्कमा लगाउन सकिने उनको विश्वास छ।
लामिछानेले ‘सुन्ने कांग्रेस’को अवधारणासमेत अघि सारेका छन्। डिजिटल माध्यमबाट नागरिकका प्रश्न, सुझाव र समस्याहरू संकलन गरी सम्बन्धित पार्टी तहसम्म पुर्याउने व्यवस्था गर्नुपर्ने उनको प्रस्ताव छ।
प्रविधि र AI लाई पार्टीको संगठन, सञ्चार र जनसम्पर्कमा प्रभावकारी रूपमा प्रयोग गर्न सके नेपाली कांग्रेसलाई आधुनिक, पारदर्शी र जनताको कुरा सुन्ने पार्टीका रूपमा विकास गर्न सकिने लामिछानेको विश्वास छ।
.JPG)
