नेकपा एमालेका अध्यक्ष केपी शर्मा ओलीले राष्ट्रपति रामचन्द्र पौडेलले डराएर प्रतिनिधिसभा असंवैधानिक रूपमा विघटन गरेको आरोप लगाएका छन्।
एमालेको जनवर्गीय संगठन नेशनल भोलिन्टियर्स फोर्सको स्थापना दिवसका अवसरमा बोल्दै ओलीले वर्तमान सरकार गठनको सुरुवात नै आतंक, आगजनी र तोडफोडबाट भएको आरोप लगाए। देशमा संवैधानिक व्यवस्था र लोकतान्त्रिक विधि कमजोर पारिएको उनको भनाइ थियो।
उनले संविधान मिचेर प्रधानमन्त्री बनेको व्यक्तिको सिफारिसमा प्रतिनिधिसभा विघटन गरिएको बताए।
‘असंवैधानिक ढंगले संसद विघटनको सिफारिस गरेर डरपोक राष्ट्रपतिले प्रतिनिधिसभाको असंवैधानिक विघटन गर्नुभयो। बडो जुक्ति लगाएर लोकतन्त्र जोगाएँ भन्नुभयो। असंवैधानिक ढंगले संसद विघटन गरेर लोकतन्त्र जोगिन्छ?’ ओलीले भने।
प्रतिनिधिसभा विघटनविरुद्ध आफूहरूले सर्वोच्च अदालतमा मुद्दा दायर गरे पनि अदालतले समयमै फैसला नगरेको उनको आरोप थियो। अदालतले मुद्दाको फैसला गरेर आफ्नो पक्षमा वा विपक्षमा जे निर्णय गरे पनि हुने तर फैसला नै नगर्नु उचित नभएको उनले बताए।
‘असंवैधानिक ढंगले प्रतिनिधिसभा विघटन भयो भनेर हामीले मुद्दा हालेपछि ठीक छ, हराउनुस्। अन्याय गर्नुस्, ठीक छ, तर फैसला त गर्नुस्। फैसला नगरिकन उहाँहरू चुप लागेर बस्नुभयो,’ उनले भने।
ओलीले लोकतन्त्र र संविधानको संरक्षण गर्ने जिम्मेवारी राज्यका निकायले पूरा नगरेको आरोप पनि लगाए। लोकतान्त्रिक संस्थाहरू कमजोर पारिएको र राज्यका निकायले त्यसको प्रतिवाद नगरेको उनको भनाइ थियो।
राज्यका निकाय आदेशका भरमा नभई कानुनअनुसार चल्नुपर्ने बताउँदै उनले देशलाई संवैधानिक र लोकतान्त्रिक विधिअनुसार सञ्चालन गर्न दबाब दिन युवाहरू संगठित हुनुपर्ने बताए।
(न्युज एजेन्सी नेपाल)