नेकपा एमालेका उपाध्यक्ष रामबहादुर थापा ‘बादल’ ले पार्टीको चुनावी पराजयको समीक्षा गर्दै अध्यक्ष केपी शर्मा ओलीको नेतृत्वको वरिपरि गोलबन्द हुन कार्यकर्तालाई आग्रह गरेका छन्।
काठमाडौंमा जारी एमालेको राष्ट्रिय कार्यकर्ता भेलामा बिहीबार प्रतिवेदन प्रस्तुत गर्दै बादलले पार्टीभित्रको एकता र नेतृत्वप्रतिको विश्वासलाई आगामी निर्वाचनमा विजय हासिल गर्ने प्रमुख आधारका रूपमा व्याख्या गरेका हुन्।
‘जब हामीले नेतृत्वको वरिपरि गोलबन्द भएका छौँ, तब हामी हाबी भएका छौँ। जब हामी नेतृत्वका विरूद्ध उभिएका छौँ, तब हामी दुवै हारेका छौँ,’ उनले प्रतिवेदनमा भनेका छन्।
उनको यो अभिव्यक्तिलाई एमालेभित्र नेतृत्वको विषयलाई लिएर उठिरहेका प्रश्न र असन्तुष्टिका बीच ओलीको नेतृत्वको पक्षमा गरिएको राजनीतिक सन्देशका रूपमा हेरिएको छ।
उनी ओलीको पक्षमा खडा हुँदै आएका नेता हुन्। प्रतिवेदनमा उनले अध्यक्ष ओलीको नामै लिएर नेतृत्वको बचाउ नगरे पनि नेतृत्वको पक्षमा एकताबद्ध हुनुपर्नेमा जोड दिएका छन्।
बादलले गत फागुनमा सम्पन्न निर्वाचनमा एमालेसहित लोकतान्त्रिक शक्तिहरूको पराजय हुनुमा पार्टीभित्रको आन्तरिक एकता कमजोर हुनु, मुख्य प्रतिस्पर्धी चिन्न नसक्नु र जनतासँग प्रत्यक्ष सम्बन्ध स्थापित गर्न नसक्नु प्रमुख कारण रहेको बताएका छन्।
‘हामीले हाम्रो प्रमुख प्रतिद्वन्द्वीलाई चिन्न सकेनौँ। हामीले हाम्रा कमजोरीहरू बुझ्न सकेनौँ। हामीले मुख्य प्रतिद्वन्द्वीका विरूद्ध परस्पर सहकार्य गर्न सकेनौँ। हामीले आन्तरिक एकता कायम गर्न सकेनौँ। हामीले जनतासँग प्रत्यक्ष सम्बन्ध गाँस्न सकेनौँ,’ उनले भनेका छन्।
उनले विगतमा पार्टीले प्रतिस्पर्धी शक्तिविरुद्ध सहकार्य गर्दा र जनतासँग प्रत्यक्ष सम्बन्ध स्थापित गर्दा चुनाव जितेको उल्लेख गरेका छन्।
नेतृत्वको वरिपरि एकताबद्ध हुँदा पार्टी बलियो बनेको उनको निष्कर्ष छ। बादलले आगामी निर्वाचनलाई ‘पपुलिस्ट र लोकतान्त्रिक शक्तिबीचको संघर्ष’ का रूपमा व्याख्या गर्दै एमालेले त्यसका लागि अहिलेदेखि नै तयारी गर्नुपर्ने बताएका छन्।
‘फागुनको पुनरावृत्ति हुन्छ वा त्यसमा क्रमभङ्ग हुन्छ भन्ने नै आजको केन्द्रीय प्रश्न हो,’ उनले भनेका छन्। उनले आगामी वर्ष स्थानीय तह, प्रदेश सभा र राष्ट्रिय सभाका निर्वाचन हुने उल्लेख गर्दै त्यसलाई सामान्य चुनावी प्रतिस्पर्धाका रूपमा मात्र लिन नहुने बताएका छन्।
उनको प्रतिवेदनमा आगामी निर्वाचनको परिणामले संविधान संशोधन र राष्ट्रिय राजनीतिको शक्ति सन्तुलनमा समेत प्रभाव पार्ने उल्लेख छ। प्रतिनिधिसभा र राष्ट्रिय सभामा दुईतिहाइ बहुमत जुटाएर संविधान संशोधन गर्न सकिने भएकाले पपुलिस्ट शक्तिहरूले त्यसका लागि प्रयास गर्न सक्ने उनको आशंका छ।
त्यसैले स्थानीय तह र प्रदेश सभामा अहिले रहेका लोकतान्त्रिक तथा राष्ट्रवादी शक्तिहरूको वर्चस्व कायम राख्नुपर्ने उनले बताएका छन्। बादलले पार्टीलाई पुनः निर्णायक राष्ट्रिय शक्तिका रूपमा स्थापित गर्न संगठन पुनर्निर्माण, राजनीतिक आन्दोलनको तयारी, निर्वाचनको तयारी, संविधान रक्षाका लागि कानुनी संघर्ष तथा जनतासँग प्रत्यक्ष संवादलाई प्राथमिकतामा राख्नुपर्ने बताएका छन्।
उनले पछिल्लो निर्वाचनको समीक्षा गरेर केन्द्रीय समितिले निकालेका निष्कर्ष कार्यान्वयन गर्नुपर्ने भन्दै आन्तरिक एकता सुदृढ गर्न जोड दिएका छन्। एमालेको राष्ट्रिय भेला फागुनको निर्वाचनमा पार्टीले व्यहोरेको पराजयको समीक्षा, संगठन पुनर्निर्माण र आगामी राजनीतिक कार्यदिशा तय गर्ने उद्देश्यले आयोजना गरिएको बताइएको छ।