बर्खास्तीमा परेका सशस्त्र प्रहरी बलका अतिरिक्त महानिरीक्षक (एआइजी) वंशीराज दाहालले पुनरावेदनको निवेदन दिएका छन्।
दाहालले गृह मन्त्रालयमा आफूलाई बर्खास्त गर्ने निर्णयमाथि पुनर्विचार गर्न मागसहित निवेदन दिएका हुन्।
सशस्त्र प्रहरी नियमावली २०७२ अनुसार कारबाही परेको ३५ दिन भित्र पुनरावेदन गर्न पाउने उल्लेख छ।
यो समयावधिभित्रै उनले निवेदन दिएको स्रोतले बतायो।
एआइजी तहको व्यक्तिलाई कारबाहीका लागि सजाय आदेश दिन सक्ने अधिकारीको रूपमा गृहमन्त्री तोकिएको छ।
पुनरावेदन सुन्ने अधिकारी भने नेपाल सरकार तोकिएको छ। अर्थात्, मन्त्रिपरिषदको बैठकले उनको कारबाही फुकुवा गर्ने वा नगर्ने भन्ने विषयमा निर्णय गर्नेछ।
असोज २३ गते सरकारले एआइजी दाहाललाई आचरण सम्बन्धी विषय पटक पटक उल्लंघन गरेको, अनुशासनहीन काम गरेको तथा नेपाल सरकार वा आफू कार्यरत संगठनको मानप्रतिष्ठा एवं छविमा आँच पुर्याउने कार्य गरेको कसुरमा दाहाललाई सेवाबाट हटाउने गरी विभागीय कारबाही गरेको थियो।
दाहाल चार वर्षे पदावधिका कारण असोज २७ गते अवकाशमा जाँदै थिए। तर त्यस अगावै उनलाई कारबाही गरेको थियो।
इनाम सापकोटा नामक व्यक्तिसँग सुरक्षासँग सम्बन्धित संवेदनशील कुराकानी भएको देखाउँदै सरकारले उनलाई कारबाही गरेको थियो। सापकोटा हाल जिल्ला प्रहरी परिसर काठमाडौंको हिरासतमा छन्। उनीमाथि सम्पत्ति शुद्धीकरणको कसुरमा अनुसन्धान भइरहेको छ।
प्रहरीले पूर्वप्रधानन्यायाधीश चोलेन्द्र शम्शेर जबरालाई समेत पक्राउ गरी १२ घण्टा पछि छाडेको थियो। त्यसबीच राति नै एआइजी दाहाल समेत भेट्न पुगेका थिए।