अवैध रूपमा अन्तर्राष्ट्रिय कल बाइपास गरेको आरोपमा भीमदत्त नगरपालिका–१८ क्याम्पस रोडबाट नेपाल प्रहरीको केन्द्रीय अनुसन्धान ब्युरो (सिआइबी) को टोलीले एक भारतीयसहित तीन जनालाई पक्राउ गरेको छ।
ब्युरोका प्रवक्ता एवं सूचना अधिकारी प्रहरी उपरीक्षक सञ्जयसिंह थापाले बिहीबार प्रेस विज्ञप्ति जारी गर्दै पक्राउ पर्नेमा भारतको नयाँदिल्ली घर भएका ४१ वर्षीय गुल्जार अहमद, दोधारा चाँदनी नगरपालिका–७ का ४० वर्षीय प्रवीण खड्का र भीमदत्त नगरपालिका–१० जिमुवाका ४७ वर्षीय दीपक बोहरा रहेको जनाएको छ।
गैरकानुनी रूपमा कल बाइपास भइरहेको सूचनाका आधारमा ब्युरोको टोली, नेपाल टेलिकम र जिल्ला प्रहरी कार्यालय कञ्चनपुरको संयुक्त टोलीले बुधबार छापा मारेर तीन जनालाई पक्राउ गरेको विज्ञप्तिमा उल्लेख छ।
चार महिनादेखि भारतीय र नेपाली नागरिक मिलेर भाडाको घरमा नेपाल टेलिकमको एसआइपी पिविएक्स कनेक्सन गरी कल बाइपास गर्दै आएका थिए। कल बाइपास गर्ने उपकरणसहित पक्राउ परेका तीनै जनालाई जिल्ला प्रहरी कार्यालय कञ्चनपुरमा बुझाइएको छ।
पक्राउ परेकाबाट कल बाइपासमा प्रयोग गरिएका ल्यापटप, कम्प्युटर मोनिटर, लाइन केबुल, मोबाइल सेट, युपिएस र ब्याट्री, नेपाल टेलिकमको ल्यान्डलाइन नम्बर ०९९५९७००० को ६० लाइन क्षमता भएको एसआइपी पिविएक्स कनेक्सन लाइन, वाइफाइ राउटर लगायत बरामद गरिएको छ।
