काठमाडौंको लाजिम्पाटस्थित इनोभा अस्पतालको पार्किङमा कुटपिट गरेको घटनामा संलग्न थप एक जना पक्राउ परेका छन्।
पक्राउ पर्नेहरूमा गोरखाको आरुघाट गाउँपालिका–८ का २९ वर्षीय सिजन अधिकारी छन्। उनलाई कञ्चनपुरबाट पक्राउ गरिएको एसपी काजीकुमार आचार्यले बताए।
यसअघि पक्राउ परेकाले बयानको क्रममा उनको नाम लिएको र सोही आधारमा उनलाई पक्राउ गरिएको एसपी आचार्यले जानकारी दिए।
उनीसहितको टोलीले कात्तिक ११ गते दिउँसो लाजिम्पाटको इनोभा अस्पतालको पार्किङमा विक्रम लामामाथि कुटपिट गरेको आरोप छ।
नुवाकोट ककनी गाउँपालिका-६ घर भई टोखा नगरपालिका वडा नम्बर -३ बस्ने ३५ वर्षीय विक्रम लामामाथि अस्पतालकै पार्किङमा अन्धाधुन्ध रड प्रहार भएको थियो।
घाइते लामाको प्राथमिक उपचार त्यही अस्पतालमा गरेर थप उपचारका लागि परिवारले ग्रीन सिटी अस्पतालमा लगेको थियो।
लामा जग्गाको व्यवसाय गर्छन्। लामा र कुटपिट गर्ने व्यक्तिहरूबीच पुरानो रिसइबी हुनसक्ने प्रहरीको प्रारम्भिक अनुसन्धानमा देखिएको थियो।
