पाँच जना महिलाको सामूहिक कुटपिटबाट झापाको अर्जुनधारामा एक महिलाको ज्यान गएको छ।
महिलाहरूको कुटपिटबाट गम्भीर घाइते भएकी अर्जुनधारा ४ की २२ वर्षीया गरिमा राई भनिने गंगा सार्कीको मृत्यु भएको झापाका प्रहरी प्रवक्ता डिएसपी खगेन्द्र खड्काले जानकारी दिए।
यो घटना मंगलबार रातिको हो।
गंगा अर्जुनधारा- ८ को शनिश्चरे क्याम्पस नजिकै बस्दै आएकी थिइन्। उनी स्थानीय प्रकाश गिरीको घरमा डेरा गरेर बसेकी थिइन्।
उनकै डेरामा आफ्ना पति गएको भन्दै सुस्मिता भुसालले आफ्ना साथीहरू लिएर कोठामै गएकी थिइन्।
‘राति ११ बजेतिर गंगाको कोठामा पुगेका ५ जनाले उनीमाथि निर्घात कुटपिट गरेको देखिन्छ,’ डिएसपी खड्काले भने, ‘उनको साथमा ५४ वर्षीय मैयाँ श्रेष्ठ, ३८ वर्षीय बबिता विक, २४ वर्षीय मेनुका पाँचकोटी र ६० वर्षीय नर्बदा सुन्दासले कुटपिट गरेको खुलेको छ। उनीहरू र सुस्मिताका पति रमेश भुसाललाई पक्राउ गरिसकिएको छ।’
कुटपिटबाट गम्भीर घाइते गंगालाई शनिश्चरेस्थित शंकर अस्पतालमा लगिएको थियो। त्यहाँबाट बिर्तासिटी अस्पताल पुर्याएकी उनको उपचारकै क्रममा बुधबार बिहान साढे १ बजेतिर मृत्यु भएको थियो।
घटनाबारे थप अनुसन्धान जारी रहेको प्रहरीले बताएको छ।
मृतक गंगा विवाहित महिला हुन्।
-1746009348.jpg)
