सवारी चालक अनुमतिपत्र (लाइसेन्स)को अवधि १० वर्ष कायम भएको छ।
सरकारले केही नेपाल ऐन संशोधन विधेयकमार्फत सवारी तथा यातायात व्यवस्था ऐन २०४९ मा संशोधन गरी चालक अनुमतिपत्रको अवधि १० वर्ष कायम गरेको हो।
सरकारले केही नेपाल ऐन संशोधन गर्न बनेको विधेयक राजपत्रमा प्रकाशित गरेको छ।
यसअघि यस्तो अवधि पाँच वर्ष रहेको थियो।
सवारी तथा यातायात व्यवस्था ऐनको दफा ५४ मा चालक अनुमतिपत्रको वैधता सम्बन्धी व्यवस्था रहेको छ। दफा ५४ को उपदफा ३ मा चालक अनुमतिपत्र दिइएको मितिदेखि दश वर्षसम्म बहाल रहनेछ भन्ने उल्लेख गरिएको छ।
त्यस्तै, ऐनको दफा ५६ मा चालक अनुमतिपत्रको नवीकरण सम्बन्धी व्यवस्था छ। संशोधनले अबदेखि चालक अनुमतिपत्र नवीकरणका लागि पेश भएमा अधिकार प्राप्त अधिकारीले त्यस्तो चालक अनुमतिपत्र अर्को दश वर्षका लागि नवीकरण गर्ने व्यवस्था गरेको छ।
-1746009348.jpg)
