अमेरिकाको एउटा विद्यालयमा एक युवकले अन्धाधुन्ध गोली चलाएका छन्।
अमेरिकाको मिनिसोटा राज्यको मिनियापोलिसस्थित एनुनसियसन क्याथोलिक चर्चभित्र सञ्चालित विद्यालयमा स्थानीय समअनुसार बुधबार बिहान एक युवकले अन्धाधुन्ध गोली चलाएका हुन्।
विद्यालयमा अन्धाधुन्ध गोली चल्दा यो वर्षको शैक्षिक सत्रको पहिलो दिनको प्रार्थना चल्दै थियो।
अन्तर्राष्ट्रिय समाचार संस्था रोयटर्सका अनुसार चर्चको बाहिरबाट झ्यालको सिसा फोडेर विद्यालय प्रवेश गरेका २३ वर्षीय सन्दिग्धले तीनवटा बन्दुक चलाएका थिए।
उनले राइफल, पेस्तोल र सटगनबाट सामूहिक प्रार्थना सभामा गोली चलाएका थिए।
गोली लागेर दुई बालकको मृत्यु भएको छ। मृत्यु हुने बालकहरू ८ र १० वर्षका छन्। उनीहरूको घाँटीमा गोली लागेको रोयटर्सले जनाएको छ।
कक्षा ५ मा अध्ययनरत विद्यार्थी वेस्टन हाल्स्नेले सीबीएस न्युजसँग घटनाबारे बताएका छन्। 'गोली मेरो छेउमै लाग्यो। साथीले मलाई जोगाउन खोज्दा आफै घाइते भए,' उनले भनेका छन्।
गोलीकाण्डमा अरू १४ विद्यार्थी र तीन जना वृद्ध घाइते भएका छन्। घाइते हुने विद्यार्थीहरू ६ देखि १८ वर्ष उमेर समूहका छन् भने तीन वृद्ध ८० वर्षका छन्।
सबै घाइतेहरूको उपचार भइरहेको र उनीहरूको स्वास्थ्य सुधारोन्मुख रहेको छ।
गोली चलाउने युवक सोही विद्यालयका पूर्वविद्यार्थी रोबिन वेटम्यान रहेको खुलेको छ।
गोली चलाएपछि ती युवकले विद्यालयको पछाडिपट्टिको भागमा गएर आत्महत्या गरेका थिए। आत्महत्या गर्नुअघि उनले एउटा भिडिओ बनाएका थिए।
भिडिओमा आफू डिप्रेसनको शिकार भएको र पछिल्ला गोली काण्ड र आपराधिक आक्रमणप्रति आफू आकर्षित भएको भनेका छन्। उनले हतियारमा गोलीकाण्डका पछिल्ला घटनाहरूमा संलग्न आक्रमणकारीहरूको नाम पनि कोरेको पाइएको छ।
स्थानीय सञ्चारमाध्यमका अनुसार वेटम्यानले २०२० मा आफ्नो नाम र लैंगिक पहिचान परिवर्तन गरेका थिए। परिवारजनले भने यसबारे कुनै टिप्पणी गरेका छैनन्।
मिनियापोलिसका प्रहरी प्रमुख ब्रायन ओहाराले निर्दोष बालबालिकामाथि गरिएको यस्तो आक्रमणलाई कडा शब्दमा निन्दा गरे।
'प्रार्थना गरिरहेका बालबालिकामाथि यसरी गोली प्रहार गर्नु अकल्पनीय क्रूरता हो,' उनले पत्रकार सम्मेलनमा भने।
एफबीआईले यस घटनालाई क्याथोलिक समुदायलाई लक्षित गरेको घरेलु आतंकवाद र घृणात्मक अपराधको रूपमा अनुसन्धान गरिरहेको जनाएको छ।
मिनियापोलिसका मेयर जेकब फ्रेले घटनालाई लैंगिक वा पहिचान राजनीतिसँग जोडेर समुदायलाई दोषारोपण नगर्न आग्रह गर्दै अमेरिकामा बन्दुक सजिलै पाइने अवस्थाकै कारण यस्ता घटनाहरू बढिरहेको टिप्पणी गरे।
घटनापछि अमेरिकी राष्ट्रपति डोनाल्ड ट्रम्पले घटनाप्रति दुःख व्यक्त गर्दै देशभर अमेरिकी झण्डा आधा झुकाउन आदेश दिएका छन्।
योसहित चालु आर्थिक वर्षमा अमेरिकाका विद्यालयमा भएको गोलीकाण्डको संख्या १४६ पुगेको छ।
यस घटनाले फेरि एकपटक अमेरिकामा बन्दुक नियन्त्रण सम्बन्धी बहसलाई चर्काएको भनेर रोयटर्सले लेखेको छ।
-1746009348.jpg)
