माडी नगरपालिकाले वाल्मीकि आश्रमस्थित धार्मिक, ऐतिहासिक तथा पुरातात्विक वस्तुको अवलोकनमा शुल्क लगाउने भएको छ।
माडी-१ मा रहेको वाल्मीकि आश्रममा सोमबार बसेको ५५ औं नगर कार्यपालिकाको बैठकले संरक्षित क्षेत्र सरसफाइ शुल्क लगाउने निर्णय कार्यान्वयनमा ल्याएको हो। गत असारमा भएको १५ औं नगर सभाले शुल्क निर्धारण गरेको थियो।
आश्रममा रहेको मन्दिरमा दर्शन गर्नबाहेक अन्य पुरातात्विक वस्तुहरूको अवलोकनमा शुल्क लगाउने निर्णय भएको मेयर ताराकुमारी काजी महतोले जानकारी दिइन्।
माडीका बासिन्दाका लागि ५, अन्य नेपालीका लागि १०, भारतीयका लागि १६ र अन्य देशका लागि ५० रुपैयाँ शुल्क तोकिएको जानकारी उनले दिइन्।
संकलन हुने रकम मन्दिरको सरसफाइमा प्रयोग गरिने नगरपालिकाले जनाएको छ।
महर्षि वाल्मीकिले तपस्या गरेको, भगवान राम र सीताका पुत्रहरूको जन्म भएको र उनीहरूले दीक्षा पाएको वाल्मीकि आश्रम भारतीय हिन्दु धर्मावलम्बीको पनि आस्थाको केन्द्र हो।
आश्रमभित्र लव-कुशको जन्मस्थल, लव-कुशले घोडा बाँधेको खम्बा, शिक्षा प्राप्त गरेको सेथल, अठ्ठासी हजार ऋषिहरूले हवन गरेको हवन कुण्ड, सीताको पाताल प्रवेशस्थल, सीताको सिलौटो, महर्षि वाल्मीकिको ब्रम्हज्ञान प्राप्ति स्थल, अन्तर्ध्यान स्थल गौरी-शंकर शंख लगायतका अवशेषहरू छन्।
चितवन राष्ट्रिय निकुञ्जभित्र बाटो नहुँदा यस आश्रममा पुग्न नवलपुर हुँदै गण्डक पुल तरेर भारतको भूमि प्रयोग गर्नुपर्छ।
नेपाली भूमिबाटै आउन नवलपुरको विनय-त्रिवेणी गाउँपालिका-६ देखि त्रिवेणी नदीमा झोलुंगे पुल निर्माण भएको छ। तर आवश्यक प्रक्रिया पूरा नभएको भन्दै चितवन राष्ट्रिय निकुञ्जले सञ्चालनको अनुमति दिएको छैन।
भारतीय भूमि प्रयोग गरेर आउँदा वाल्मीकि टाइगर रिजर्वलाई १० देखि ५० भारतीय रुपैयाँ प्रवेश शुल्क बुझाउनुपर्छ।
मेयर महतोले वाल्मीकि आश्रम नेपाली भूमिमा पर्छ भन्ने सन्देश सबै देशबाट आउने भक्तजनलाई दिनका लागि पनि शुल्क लिने निर्णय गरिएको जानकारी दिइन्।
कार्यपालिका बैठकले वाल्मीकि आश्रम नजिक रहेका १४ घरधुरीको छानो छाउन जस्ताको पाता उपलब्ध गराउने, बालबालिकालाई प्रारम्भिक शिक्षा उपलब्ध गराउन एक जना प्रारम्भिक बालविकास सहजकर्ता खटाउने निर्णय पनि गरेको उपमेयर खेमप्रसाद महतोले जानकारी दिए।
साथै मन्दिरहरू चौबिसै घण्टा खुला गर्ने, सरसफाइका लागि कर्मचारी खटाउने, खानेपानी, भूक्षय नियन्त्रणका लागि आवश्यक काम गर्ने निर्णय गरिएको उनले बताए।
‘हामीले सरसफाइ शुल्क भनेर सामान्य शुल्क उठाउन खोजेका छौं। संकलन भएको रकममा नगरपालिकाबाट थप गरेर मन्दिरको सरसफाइ र संरक्षणमा खर्च गर्नेछौं,’ महतोले भने, ‘स्थानीयबासीको गाँस, बासका लागि पनि नगरपालिकाले आवश्यक काम गर्नेछ।’
नगरपालिकाका प्रमुख प्रशासकीय अधिकृत जगतप्रसाद भुषालले शुल्कले वाल्मीकि आश्रमको संरक्षण र सम्वर्द्धनमा सघाउने बताए।
उनले नगरपालिकाले अपनत्व लिएर काम गर्न नसक्दा वाल्मीकि आश्रमको अपेक्षित विकास हुन नसकेकाले अब अपनत्व लिएरै काम गर्ने निर्णय भएको बताए।
-1756721867.jpg)
-1756721866.jpg)
-1756721866.jpg)
-1756721866.jpg)
-1756721866.jpg)
-1746009348.jpg)
