सप्तरीको महादेवा गाउँपालिका वडा नम्बर १ को २१ वर्षीया दीपाकुमारी यादवलाई बिरामी भएको भन्दै उनका श्रीमानले शनिबार अस्पताल पुर्याएका थिए।
गजेन्द्रनारायण सिंह अस्पताल पुर्याउँदा उनलाई चिकित्सकले मृत घोषणा गरेका थिए।
उनको मृत्यु भएको थाहा पाएपछि जिल्ला प्रहरी कार्यालयको टोली शव परीक्षण गर्न अस्पताल पुगेको थियो।
दीपाकुमारीको श्रीमान दीपककुमार यादवले सुतेको ठाउँमै बेहोस भएको भन्दै अस्पताल ल्याएको चिकित्सकलाई बताएका थिए।
तर प्रहरीले दीपाकुमारीको घाँटीमा निलो डाम देख्यो।
दीपककुमारले बताएजस्तो घटनाक्रम नदेखिएपछि अस्पतालबाट तत्काल शव निकाल्न नदिइ अनुसन्धान अगाडि बढाइएको जिल्ला प्रहरी कार्यालय सप्तरीका डिएसपी जीतेन्द्रकुमार बस्नेतले जानकारी दिए।
'दीपककुमारले भने भन्दा प्रमाणहरू फरक देखिएको थियो। त्यसैले हामीले उनीहरूसँग सुरूमा सामान्य सोधपुछ गर्यौं,' डिएसपी बस्नेतले भने, 'दीपककुमार सोधपुछ गर्दा हडबडाएपछि नियन्त्रणमा लिएर अनुसन्धान अगाडि बढाएको हौं।'
मृतक र दीपकको असार ४ गते मागी विवाह भएको थियो।
दीपाकुमारी प्लस टु पढ्दै थिइन्। उनका बुबा संजिवकुमार यादव रोजगारीका लागि लामो समयदेखि मलेसियामा छन्।
श्रीमानले अलिअलि पैसा कमाउन सकेकै बेलामा छोरीको विवाह गरिदिने निर्णय गरेको आमा प्रमिलादेवी यादवले सेतोपाटीलाई जानकारी दिइन्।
विवाहका लागि आफन्तमार्फत नै कुरा आएको थियो। उनीहरूले राम्रो घर परिवार छ भनेपछि प्लस टु पढ्दापढ्दै विवाह गरिदिएको प्रमिलादेवी यादवको भनाइ छ।
'अहिले दुईचार पैसा कमाउन सक्दा नै विवाह गरिदिऊँ भन्ने लाग्यो। त्यसैले ऋण खोजेर छोरीको विवाह गरिदिएका हौं,' उनले भनिन्, 'मधेसमा पैसा नभइ छोरीको विवाह गर्न सकिँदैन, त्यसैले हतार गर्यौं।'
उनलाई आफन्तहरूले दीपककुमारको परिवार राम्रै छ भन्ने सुनाएका थिए। दीपककुमार सव-ओभरसियरको पदमा काम गरिरहेका थिए। त्यसले गर्दा राम्रो परिवार भनेर विवाह गराइदिएको उनको भनाइ छ।
दीपाकुमारी उनको एक्ली छोरी हुन्। अर्काे एउटा छोरा छ।
विवाहमा नगद र बैंकिङ गरेर दीपककुमारको परिवारलाई १२ लाख रूपैयाँ पैसा दिएको मृतकको ठूलोबुवा ५५ वर्षीय विनदलेख यादवले बताए।
उनका अनुसार विवाहमा फर्निचरको सामान, लुगाधुने मेसिनसहित गरेर लगभग २५ लाखभन्दा बढी खर्च गरिएको थियो। त्यसमा ५/७ लाख रूपैयाँ भाइ संजिवकुमारले कमाए पनि बाँकी ऋण खोजेर गरिदिएको हो।
विवाह गरेको एक महिनासम्म सम्बन्ध राम्रै चलिरहेको थियो। दोस्रो महिनादेखि दाइजो कम भएको भनेर गुनासो गर्ने गरेको विनदलेखले जानकारी दिए।
'रक्षाबन्धनमा दीपाकुमारी माइती आएकी थिइन्। त्यतिबेला एउटा मोटरसाइकल चाहियो भनेर यातना दिनेगरेको छ भनेर सुनाएकी थिइन्,' विनदलेखले भने, '१२ लाख रूपैयाँ बाइकसमेत किन्न भनेर पैसा दिएका थियौं। पछि थप माग्नुभयो।'
आफूहरूको कमाइ नभएकाले तत्काल किन्न नसक्ने भन्दै छोरीलाई पठाएको उनको भनाइ छ।
त्यसपछि विनदलेखसम्म केही कुरा भएको थिएन। यता आमा प्रमिलादेवीसँग भने दाइजोकै कारणले आफूमाथि यातना दिने र कुटपिट गर्ने गरेको सुनाइरहेकी थिइन्।
विवाहको ऋण तिर्न नसकेकाले केही महिना पर्खिन भनेको मृतककी आमा प्रमिलादेवीले जानकारी दिइन्।
'दाइजो मागिरहेको छन् भन्ने थाहा थियो। पैसा नभएकाले दिन सकेका थिएनौं। त्यही कारणले छोरीलाई मारिदिए,' मृतकको काका भगवतीप्रसाद यादवले भने, 'हामीलाई मृत्यु भइसकेपछि मात्र जानकारी आयो।'
सुतिरहेको ठाउँमा बेहोस भएर अस्पताल लैजाँदा मृत घोषित गरिदिएको जानकारी दिइएको थियो तर अस्पताल पुग्दा र प्रहरीले जाँचबुझ गर्दा हत्या भएको देखिएको उनले बताए।
उनका अनुसार भगवतीप्रसादले नै भतिजी दीपाकुमारीको हत्या भएको भन्दै कर्तव्य ज्यान मुद्दामा आइतबार प्रहरीमा उजुरी दिएका छन्।
उनको हत्या शंकास्पद भएसँगै प्रहरीले दीपाकुमारीको श्रीमान दीपककुमार र ससुरा पशुराम यादवलाई पक्राउ गरेको छ।
'घाँटीमा निलडाम भएकाले थिचेर मारिएको हो कि भन्ने अनुमान गरेका छौं,' डिएसपी बस्नेतले भने, 'अहिलेसम्मको अनुसन्धानमा श्रीमानले हत्या गरेको हुन सक्ने अनुमान गरेका छौं। किन गरे भन्ने कुरा अनुसन्धान भइरहेको छ।'
मृतकको शव आइतबार साँझ पोष्टमर्टमका लागि धरानस्थित बिपी कोइराला स्वास्थ विज्ञान प्रतिष्ठान पठाइएको छ। ढिला पुगेकाले राति पोष्टमर्टम भएन। सोमबार पोष्टमर्टम भइरहेको छ। त्यसको रिपोर्टपछि नै घटनाक्रम खुल्दै जाने डिएसपी बस्नेतले जानकारी दिए।
मृतकको श्रीमान र ससुरालाई भने जिल्ला अदालतबाट कर्तव्य ज्यान मुद्दामा ६ दिनको म्याद थप गरेर अनुसन्धान भइरहेको प्रहरीले जनाएको छ।
-1746009348.jpg)
