रूपन्देहीमा दसैंको एकै दिन ३०५ स्थानमा निर्माण गरिएका दुर्गा मूर्ति विसर्जन गरिएको छ।
जिल्ला प्रहरी कार्यालय रूपन्देहीका अनुसार दसैंको नवरात्रमा दुर्गा पूजाका लागि जिल्लाका विभिन्न ४७६ स्थानमा दुर्गा मूर्ति स्थापना गरिएको थियो।
नवरात्र पूजाका लागि घटस्थापनाको दिनदेखि स्थापना गरिएका अधिकांश मूर्ति दसैंको दिनमै नदी तथा तालमा लगेर विसर्जन गरिएको हो। बाँकी मूर्ति पनि पूर्णिमाको दिनसम्म विसर्जन गरिन्छ।
जिल्ला प्रहरी कार्यालय रूपन्देहीका प्रमुख प्रहरी उपरीक्षक प्रदीप कुमार क्षत्रीका अनुसार शुक्रबार १२५ स्थानका दुर्गा मूर्ति विसर्जन हुँदै छन्।
शक्तिकी देवी मानिने दुर्गा भवानीको पूजाका लागि हरेक वर्ष रूपन्देही लगायत तराईका जिल्लामा बजार र गाउँघरका चोकमा दुर्गा भगवती, सरस्वती, लक्ष्मी, गणेश, कार्तिकेय लगायतका अस्थायी मूर्ति स्थापना गरी नवरात्रभरि पूजा गर्ने चलन छ।
माटोसँगै खर, डोरी, बाँस, सनपाट, पराल, भुस, काठको धुलो, रङ, कपडा लगायत प्रयोग गरी बनाइएका दुर्गा मूर्तिमा घटस्थापनादेखि महानवमीसम्म पूजा गरिन्छ भने दसैंको दिनदेखि विसर्जन सुरू हुन्छ।
एक लाख ५० हजारदेखि दुई लाख सम्म खर्चेर गाउँ गाउँमा स्थापना गरिएका दुर्गा मूर्तिलाई ट्याक्टर र जिपमा राखेर श्रद्धालुहरूले नजिकका घाट तथा नदी र तालहरूमा लगेर विसर्जन गर्छन्।
'विगत वर्षका घटनालाई हेर्ने हो भने पनि दुर्गा विसर्जनमा कहिलेकाहीँ समस्या देखिने गरेका छन्। विगतका घटनाबाट पाठ सिक्दै यस वर्ष त्यस्ता कुनै घटना नहोस् भनेर हामीले उच्च सतर्कता अपनाएका छौं,' क्षत्रीले भने।
रूपन्देहीका प्रमुख जिल्ला अधिकारी टोकराज पाण्डेले पनि यस वर्ष दसैं अवधिभर रूपन्देहीमा कुनै पनि अप्रिय घटना नभएको बताए।
प्रहरी उपरीक्षक क्षत्रीका अनुसार जिल्लाका विभिन्न इलाका प्रहरी कार्यालय, प्रहरी चौकी र अस्थायी प्रहरी पोस्ट समेतमा गरी १ हजार १ सय ७१ जना प्रहरीलाई ड्युटीमा खटाइएको थियो। बिरामी, सुत्केरी र किरिया बस्नुपर्ने प्रहरी कर्मचारीबाहेक अन्यले बिदा बस्न नपाउने प्रहरीले सर्कुलर गरेको छ।
-1746009348.jpg)
