सर्वोच्च अदालतका न्यायाधीश तिलप्रसाद श्रेष्ठले आफ्ना लागि स्वस्फूर्त रूपमा सहयोगका लागि संकलन गर्न थालिएको काम स्थगन गर्न अनुरोध गरेका छन्।
बुधबार उनले प्रेस विज्ञप्ति जारी गर्दै आर्थिक रकम स्थगन गर्न अनुरोध गरेका हुन्।
उनमा बोनम्यारोसम्बन्धी गम्भीर समस्या देखिएपछि न्यायपालिका अधिकृत समाजले आर्थिक सहयोगका लागि रकम संकलन गर्न थालेको थियो। श्रेष्ठको भारतको नयाँदिल्लीस्थित राजीब गान्धी क्यान्सर इन्स्टिच्यूट एन्ड रिसर्च अस्पतालमा उपचार भइरहेको छ।
‘बोनम्यारो समस्याका कारण म अहिले भारतको नयाँदिल्लीस्थित राजीव गान्धी क्यान्सर इन्स्टिच्यूट एन्ड रिसर्च अस्पतालमा उपचार गराइरहेको छु। मेरो उपचारमा चासो, चिन्ता, स्वास्थ्यलाभ र सदभाव व्यक्त गर्नुहुने सबैप्रति म अनुगृहित छु। मेरा शुभेच्छुक एवं शुभचिन्तकहरूले मेरो उपचारका सन्दर्भमा स्वस्फूर्त रूपमा सहयोग जुटाउने हेतुले रकम संकलन गर्न थाल्नु भएको खबर पनि पाएको छु,’ उनले भनेका छन्, ‘न्यायसेवा अधिकृत समाजले न्यायपालिकामा कार्यरत सम्पूर्ण राष्ट्रसेवक कर्मचारीलाई स्वेच्छिक रूपमा यथाशक्य आर्थिक सहयोग गर्न आह्वान गरेको पनि थाहा पाएँ। यो आर्थिक संकलनको कार्य स्थगित गरिदिनु हुन सबैमा मेरो विनम्र अनुरोध छ।’
श्रेष्ठ पछिल्लो एक महिनादेखि भारतमा उपचाररत छन्।
