सुर्खेत प्रहरीले तीन करोड बढीका गरगहना र नगदसहित एक जनालाई पक्राउ पछि सार्वजनिक गरेको छ।
पक्राउ पर्नेमा बाँकेको नेपालगंज उपमहानगरपालिका – १० घर भइ हाल सुर्खेतको वीरेन्द्रनगर नगरपालिका – ६ मा बस्दै आएका ६३ वर्षीय श्यामसुन्दर अग्रवाल –बालाजी) छन् ।
उनको साथबाट नेपाली रुपैंया दुई लाख १९ हजार पाँच सय, भारतीय रुपैंयाँ आठ लाख ११ हजार आठ सय र विभिन्न प्रकारका सुन तथा चाँदीका गरगहना एक सय ८५ थानको अनुमानित मूल्य ३ करोड बराबर बरामद भएको हो ।
सोमबार दिउँसो ४ बजेतिर वीरेन्द्रनगर – ६ तल्लो बजारस्थित ‘शिब इम्पोरियम’ नामक कपडा पसलबाट अग्रवाल पक्राउ परेका हुन्।
भारतीय रुपैंया र गरगहना धितो राखेर ब्याजमा नगद दिने कार्यमा संलग्न रहेको भन्ने गोप्य सूचनाको आधारमा कर्णाली प्रदेश प्रहरी कार्यालय सुर्खेत र जिल्ला प्रहरी कार्यालय सुर्खेतबाट खटिएको संयुक्त टोलीले उनलाई नियन्त्रणमा लिएको सुर्खेतका प्रहरी प्रवक्ता डिएसपी कबिन्द्रसिंह बोहराले बताए ।
उनको साथबाट प्रहरीले नगद रुपैंयाँ गणना गर्न प्रयोग हुने एउटा मेसिन पनि बरामद भएको जनाएको छ।
