जेनजी आन्दोलनको दोस्रो दिन भदौ २४ गते आगजनी र तोडफोड गरेर ध्वस्त पारिएको युलेन्स स्कुलले यस वर्षको दीक्षान्त समारोह आयोजना गरेर आफू सामान्य अवस्थामा फर्किएको सन्देश दिएको छ।
युलेन्स एजुकेसन फाउन्डेसनद्वारा सञ्चालित युलेन्स स्कुलले सन् २०२६ ब्याचका विद्यार्थीका लागि गत शनिबार दीक्षान्त समारोह आयोजना गरेको हो।
विद्यालय व्यवस्थापन समितिका अध्यक्ष प्राडा भोला थापाको अध्यक्षता तथा चिकित्सक डा. चक्रराज पाण्डेको विशेष सम्बोधनसहित सम्पन्न कार्यक्रममा दीक्षित विद्यार्थी, अभिभावक, शिक्षक, कर्मचारीको उपस्थिति थियो।
प्रमुख वक्ता डा. पाण्डेले दीक्षान्त समारोहलाई सम्बोधन गर्दै विद्यार्थीहरूलाई सिँगो जीवन नै सिकाइको निरन्तर पाठशालाका रूपमा लिएर सिकिरहन, सिकाइका आधारमा प्राप्त ज्ञानको बलमा समाजका विविध आयामको अर्थपूर्ण नेतृत्व गर्दै समाजमा सकरात्मक योगदान थप्न प्रेरित गरे।
राष्ट्रिय परीक्षा बोर्ड अर्थात् दस जोड दुई तर्फबाट कक्षा १२ का ५६ विद्यार्थी तथा इन्टरनेसनल ब्याकलोरियट डिप्लोमा प्रोग्राम (आइबिडिपी) का १३४ जना गरी कुल १९० विद्यार्थीलाई दीक्षित गर्दै युलेन्स स्कुलका पूर्व अभिभावकसमेत रहेका चिकित्सक पाण्डेले असफलता र सफलता सापेक्ष रहेको उल्लेख गरे।
आफ्नो जीवनको अति कठिन घडीमा पनि एउटा प्रतिबद्ध शैक्षिक संस्थाका रूपमा अविचलित उभिनुबाट युलेन्सजस्ता नाफा वितरण नगर्ने शैक्षिक संस्थाको महत्त्वलाई थप प्रमाणित गरेको पाण्डेको धारणा थियो।
सन् २००६ मा पठनपाठन आरम्भ भएको युलेन्स स्कुलमा हाल विभिन्न १८ राष्ट्रियता तथा २० भन्दा बढी जनसांख्यिक समुदायका १४०० भन्दा बढी विद्यार्थी अध्ययनरत छन्।
ललितपुरको खुमलटार र काठमाडौंको बाँसबारीमा युलेन्स स्कुल सञ्चालन गरिरहेको युलेन्स एजुकेसन फाउन्डेसनका अध्यक्ष प्राडा थापाले विद्यालयका शिक्षक र कर्मचारीले विद्यार्थीको जीवनका लागि आवश्यक ज्ञान, प्रेम, करूणा, साहस, सामाजिकता, सिर्जनात्मकता, कठिन समयलाई झेल्ने आत्मबलले भरिपूर्ण गराउउँदै विद्यार्थीमैत्री विश्वस्तरीय ज्ञान हस्तान्तरणका लागि गरेको योगदानका लागि धन्यवाद दिए।
-1781600969.jpeg)
