जलवायु नीति तथा लाभको वितरण आदिवासी जनजाति समुदायसम्म पुग्नुपर्ने एक कार्यक्रमका सहभागीहरूले बताएका छन्।
नेपाल आदिवासी जनजाति महासंघ संघीय परिषद्ले कृषि, वन तथा पर्यावरण मन्त्रालय रेड कार्यान्वयन केन्द्रसँगको सहकार्यमा आयोजना गरेको 'जलवायु नीति तथा लाभ वितरण योजना तर्जुमामा आदिवासी जनजातिको भूमिका विषय अभिमुखीकरण कार्यक्रम' मा सहभागीहरूले त्यस्तो बताएका हुन्।
त्यस अवसरमा बोल्दै नेपाल आदिवासी जनजाति महासंघका अध्यक्ष निमा लामा ह्लयोल्मोले कार्बन र रेड के हो ? त्यसमा आदिवासी जनजातिहरूले कसरी फाइदा लिन सक्छन् भन्ने विषयमा सबैलाई बुझाउन अझै पनि नसकिएको बताए।
रेड, रेडप्लसको विषयमा बुझ्दै अहिले कार्बन व्यापार बापतको लाभ लिने अवस्थामा नेपाल आइपुगेको भन्दै उनले यसले अझै पनि आदिवासी जनजाति समुदायलाई समेट्न नसकेको अवस्था रहेको बताए।
खासगरी लाभ वितरणको सन्दर्भमा आदिवासी जनजाति समुदायसमक्ष प्रत्यक्ष रूपमा लाभ पुग्न नसकेको उनको भनाइ थियो। त्यस अवसरमा विशेष प्रस्तुति दिँदै रेड कार्यान्वयन केन्द्रका प्रमुख सहसचिव नवराज पुडासैनीले नेपालले अहिले कार्बन व्यापारबाट लाभ प्राप्त गर्न थालेको भन्दै यसलाई प्रदेशमार्फत तल्लो तहसम्म पुर्याएको बताए।
तर अझै पनि सबै समुदायसम्म पुग्न नसकेको भन्दै उनले लाभ वितरणमा आदिवासी जनजाति समुदाय समेटिन नसकेको भन्दै लाभ वितरणमा विशेष योजना बनाएर जान सकिने बताए।
