अख्तियार दुरूपयोग अनुसन्धान आयोगले नक्कली शैक्षिक योग्यता प्रमाणपत्र पेस गरी सरकारी सेवा सुविधा लिएको आरोपमा बालविकास सहजकर्ताविरूद्ध भ्रष्टाचार मुद्दा दायर गरेको छ।
पाँचथरको हिलिहाङ गाउँपालिका–७ जय भवानी माध्यमिक विद्यालबाट सञ्चालित बालविकास केन्द्रको सहयोगी कार्यकर्ता (बालविकास सहजकर्ता) बिनाकुमारी राई विरूद्ध अख्तियारले आइतबार विशेष अदालतमा मुद्दा दायर गरेको हो।
बिनाकुमारीले जागिर प्राप्त गर्न तथा पदमा कायम रहन कक्षा ८ र एसएलसीको कागजात नक्कली पेस गरेको अख्तियारको प्रवक्ता सुरेश न्यौपानेले जानकारी दिए।
अनुसन्धानका क्रममा राईले पेस गरेका शैक्षिक प्रमाणपत्रहरू झूटा तथा नक्कली रहेको पुष्टि भएको अख्तियारको दाबी छ।
ती प्रमाणपत्रका आधारमा उनले राष्ट्रसेवक पदमा नियुक्ति प्राप्त गर्नुका साथै सरकारी सेवा सुविधा समेत लिएको अख्तियारको आरोप छ।
-ink-1757668414.jpeg)
