सडकपेटीमा आश्रित दृष्टिविहिनहरूमाथि समेत बलपूर्वक हटाउने र जबरजस्ती धरपकड गरेपछि सरकारविरूद्ध उनीहरूले पनि प्रदर्शन सुरू गरेका छन्।
सोमबार काठमाडौंको माइतीघर मण्डलमा उनीहरूले वर्तमान सरकारले सडकपेटीमा समेत गरिखान नदिएको भन्दै बलपूर्ण धरपकड र जबरजस्ती विरूद्ध धर्ना दिन सुरू गरेका हुन्।
वर्तमान सरकारले, सडकपेटी, मठमन्दिर, चोक लगायतका क्षेत्रमा बसेर गरिखान समेत नदिने, उल्टै नगर प्रहरीले आएर धरपकड गर्ने, जबरजस्ती गर्ने गरेपछि आफूहरूले त्यसको विरूद्धमा धर्ना लगायतका आन्दोलनको कार्यक्रम सुरू गर्न बाध्य हुनु परेको सडकपेटी केन्द्रित स्वरोजगारमूलक दृष्टिविहीन व्यवसायीहरूको समूहका संयोजक सुदीप ओलीले बताए।
उनले सरकारले आफूहरूलाई बिना विकल्प सडकमा समेत गरिखान नदिएको भन्दै आक्रोश व्यक्त गरे।
दृष्टिविहीनहरूले सरकारसँग आफूहरूलाई बाँच्नका लागि मासिक २० हजारका दरले भत्ताको व्यवस्था गर्न पनि सरकारसँग माग गरेका छन्।
दृष्टिविहीन ओलीले भने, ‘आज बालेन सरकारले हामीलाई बाँच्न दिएन। किनभने गाँस, बास, कपासको ग्यारेन्टी गरिदिएन। हामीले धुपहरू बेच्थ्यौं। कतिले वेट मेसिनहरू राख्थ्यौं सडक, चोक, मठमन्दिरहरूमा। कतिले त कला, गला देखाएर गीतहरू गाएर सहयोग उठाएर खाने काम गरिराखेका थियौँ। तर बालेन सरकारले त्यो हामीलाई दिएन। नगर प्रहरीहरू आएर दमन गर्ने। होल्डिङ सेन्टरमा लगेर दिनभर थुन्ने, साँझ परेपछि छोडिदिने। महिलाहरूमाथि हातपात पनि गरिएका छन् नगर प्रहरीहरूले। त्यसैको विरोधमा यस्तो गर्नुपरेको हो।’
उनले अगाडि भने, ‘अब राज्यले हामीलाई कि त गरिखान दिनुपर्यो। कि बेरोजगार भत्ता महिनाको २० हजार दिनुपर्यो। कि त योग्यता र क्षमताको हिसाबमा काम दिनु पर्यो। जस्तो हातले गर्न सक्ने काम छ भने कति साथीहरू पढे लेखेका हुनुहुन्छ। उहाँहरूको लाइसेन्स सिरानीमा छन्। उहाँहरूको त्यो अनुसार व्यवस्थापन गर्नुपर्यो। नपढेकाहरूलाई भत्ता र त्यस्तै काम दिन सक्नुपर्यो भनेर हाम्रो गाँस, बासको लागि यो आन्दोलन हो।’
उनीहरूले दैनिक बिहान नौ बजेदेखि १२ बजेसम्म सरकारले आफूहरूलाई बाँच्नका लागि वैकल्पिक व्यवस्था नगरेसम्म आन्दोलन गर्ने चेतावनी दिएका छन्।
दृष्टिविहिनहरुलाई योग्यता र क्षमताको आधारमा भत्तासहित रोजगारीको व्यवस्था गर्नुपर्ने उक्त समूहको भनाइ थियो। –न्युज एजेन्सी नेपाल
