राइड सेयरिङ एपका चालकले १४ वर्षीया बालिकालाई बलात्कार गरेको आरोपमा काठमाडौं जिल्ला अदालतमा मुद्दा दर्ता भएको छ।
बारा घर भई काठमाडौं बस्दै आएका चालक २३ वर्षीय सुशील मोक्तान विरूद्ध बिहीबार सरकारी वकिल कार्यालयले अदालतमा मुद्दा दर्ता गरेको हो।
युवकले काठमाडौं कागेश्वरी मनोहरा नगरपालिका-८ को आफ्नै डेरामा पुर्याएर बालिकालाई बलात्कार गरेको अभियोगपत्रमा उल्लेख गरिएको छ।
यो घटना एक महिना अघिको हो।
बारा निजगढ नगरपालिका-६ घर भई हाल कागेश्वरी मनोहरा नगरपालिका-८ बस्ने सुशिल लाजिम्पाटको एक रेस्टुरेन्टको कुकको काम गर्थे।फुर्सदको समयमा राइड सेयरिङको काम पनि गर्दै आएका थिए।
जेठ १४ गते बेलुका टोखा बस्ने बालिका माछापोखरीबाट गोकर्ण जान एप बुक गरेकी थिइन्।
चालक सुशीलसँग यात्राका क्रममा सामान्य कुराकानी भई ह्वाट्सएप नम्बर आदानप्रदान भएको बालिकाले दिएको बयानमा उल्लेख छ।
'१५ गते पनि सुशीलले फोन गरेर भेट्न बोलाएको थियो। तर फुर्सद छैन भनेर फोन राखिदिएँ,' बालिकाले बयानमा भनेकी छन्, '१६ गते बेलुका ७ बजेतिर तिमीलाई लिन आउँछु घुमघाम गरेर पुनः कोठामै पुर्याइदिन्छु भनेकाले ठिकै छ भन्ने सोचेँ।'
८ बजेतिर कोठा छेउमै लिन आएको र बालिकाले कता घुम्न जाने भनेर सोधेकी थिइन्। सुशीलले जोरपाटी लैजाने भने। त्यसपछि उनले दाजुभाउजूको कोठामा पुर्याए। उनका अनुसार त्यहाँ दाइभाउजू भने थिएनन्, अन्य साथीहरू थिए।
'त्यहाँ पुगेपछि सुशीलले मदिरा (बियर) लिएर आयो। त्यसपछि साथीहरूसँगै बसेर खान थाल्यो। र मलाई पनि खान आग्रह गर्यो। खाँदिनँ भन्दा थोरै खाऊ भनी कर गरी बियर खुवायो,' बालिकाले भनेकी छन्, 'खाँदिनँ भन्दाभन्दै खुवाउनुभयो। खाँदै जाँदा बिहानको ३ बज्न लागेको थियो। उज्यालो हुने बेला भयो। अब डेरासम्म पुर्याइदेऊ भनेर भनेकी थिएँ।'
बालिकाले डेरा पुर्याइदिन भनेपछि उनले मोटरसाइकल निकालेर हिँडेका थिए। तर जोरपाटी चोकमा पुगेपछि एकछिन बसेर बियर खाऊँ भनी पुनः २ बोतल किनेर कागेश्वरी मनोहरा नगरपालिका-८ किरातचोकस्थित उसको डेरामा लिएर गएको बयानमा उल्लेख छ।
'डेरा पुगेपछि किनेर लगेको १/१ बोतल बियर खायौँ। त्यति सक्दा करिब साढे ४ भएको थियो। त्यसपछि निजले मलाई तानी ओछ्यानमा पुर्याएर जबरजस्ती कपडा खोलेर बलात्कार गर्यो,' बयानमा भनेकी छन्, 'मैले प्रतिकार गर्दा पनि सकिनँ। बलात्कारपछि सुशील सुत्यो। त्यही मौका छोपेर आफू शौचालय जाने बहाना गरी नयाँ बानेश्वरको साथीलाई लोकेशन सेयर गरिदिएँ।'
उनले साथीलाई लोकेशन सेयर गरेपछि साथीले तत्काल प्रहरीमा खबर गरिदिएका थिए। प्रहरी घटनास्थलमा पुग्दा सुशील पाइन्ट खोली अर्धनग्न अवस्थामा सुतिरहेकै अवस्थामा नियन्त्रणमा लिएको थियो।
प्रहरीले जेठ १७ गते नै गरेको घटनास्थल मुचुल्काअनुसार आरोपी मोक्तान बस्ने भुइँतलाको कोठामा भुइँमै ओछ्यान लगाइएको र त्यसमा गुलाबी रङको तन्ना जेलिएको अवस्थामा फेला परेको थियो। ओछ्यानको अगाडि चुरोटका बट्टा, नेपकिनका टुक्राहरू, दुइटा सिसाका खाली गिलास र भित्तानजिकै दुई वटा बियरका खाली बोतलहरू फेला परेको अभियोगपत्रमा उल्लेख गरिएको छ।
प्रहरी हिरासतमा रहेका प्रतिवादी सुशील मोक्तानले भने आफूले जबरजस्ती नगरेको दाबी गरेका छन्।
उनले बयानका क्रममा आफूले दाजुको कोठामा बियर खाँदै गरेको भिडिओ ह्वाट्सएपमा पठाएपछि महिलाकै आग्रहमा लिन गएको र आफ्नो कोठामा दुवैको आपसी सहमतिमै सम्बन्ध भएको बयान दिएका छन्।
आरोपीले सम्बन्ध 'सहमति'मा भएको दाबी गरे पनि बालिकाको बयान, घटनास्थलको प्रकृति र अर्धनग्न अवस्थामै रंगेहात पक्राउ परेकाले १४ वर्षीया बालिकामाथि बलात्कार भएको साबित हुन आएको प्रहरीको निष्कर्ष छ।
साथै, उपरोक्त तथ्य, आधार र प्रमाणहरूबाट प्रतिवादी सुशीलले १४ वर्षकी बालिकालाई घुम्न जाऊँ भनी बोलाई नशालु पदार्थ बियर सेवन गराई मिति जेठ १७ गते बिहान ४:३० बजेको समयमा डेरा पुर्याई बलात्कार गरेको पुष्टि भएको अभियोगपत्रमा उल्लेख छ।
बलात्कार गरेको ठहर भएको भन्दै सुशीललाई मुलुकी अपराध संहिता, २०७४ को दफा २१९ को उपदफा (३) को खण्ड (ग) बमोजिम सजाय हुन सरकारी वकिल कार्यालयको माग छ। (३) को खण्ड (ग) मा १४ वर्ष वा चौध वर्षभन्दा बढी र सोह्र वर्षभन्दा कम उमेरकी बालिका भए १२ वर्षदेखि १४ वर्षसम्म कैद हुने उल्लेख छ।
