हत्या अभियोगमा १० वर्ष कैद सजाय भुक्तान गरी छुटेका व्यक्ति फेरि लागुऔषधसहित पक्राउ परेका छन्।
लागुऔषध नियन्त्रण ब्युरो शाखा कार्यालय विराटनगरको टोलीले तीन जनालाई पक्राउ गरेको छ। पक्राउ परेकामध्ये सुनसरी बराहक्षेत्र नगरपालिका-३ का ४२ वर्षीय विष्णु धामीले १० वर्ष कैद भुक्तान गरिसकेका व्यक्ति हुन्।
प्रहरीले ३६ वर्षीय रूद्रबहादुर सुवेदी र ४८ वर्षीय विजयराज धामीलाई पनि पक्राउ गरेको छ।
उनीहरूबाट प्रहरीले २७१ ग्राम खैरो हेरोइन बरामद गरेको छ।
भारतबाट लागुऔषध खैरो हेरोइन ल्याएर उनीहरूले सुनसरी, धनकुटा, इलाम, भोजपुर लगायत जिल्लामा बिक्री वितरण गर्ने गरेको ब्युरोका प्रवक्ता एसपी दुर्गाराज रेग्मीले जानकारी दिए।
उनीहरूबाट २ लाख ४५ हजार ८०० रुपैयाँ र ३ वटा तराजु पनि बरामद भएको छ।
