दाङको तुलसीपुर उपमहानगरपालिका–१९ की २६ वर्षीया कमला खड्का वलीको हत्या आरोपमा उनका श्रीमानसहित चार जनालाई पुर्पक्षका लागि थुनामा पठाउन उच्च अदालत तुलसीपुरले आदेश दिएको छ।
कमलाको गत चैत १२ गते घरभित्रै २८ वर्षीय श्रीमान गोपाल वलीले चिर्पट प्रहार गरी निर्ममतापूर्वक हत्या गरेका थिए।
उच्च अदालत तुलसीपुरका मुख्य न्यायाधीश राजेश्वर तिवारी र न्यायाधीश नरबहादुर खड्काको संयुक्त इजलासले असार ११ गते कमलाको हत्याका मुख्य आरोपी गोपालसहित उनका परिवारका अन्य तीन जनालाई पनि पुर्पक्षका लागि थुनामा राख्न आदेश दिएको अदालतका सूचना अधिकारी कृष्णप्रसाद शर्माले बताए।
उच्च अदालतले गोपालका बुवा कर्णबहादुर वली, भाउजू टीका केसी वली र बहिनी पुतला वलीलाई पनि पुर्पक्षका लागि थुनामा पठाउन आदेश दिएको हो।
यसअघि जिल्ला अदालत दाङले थुनछेक बहसपछि हत्याका मुख्य आरोपी गोपाललाई मात्र पुर्पक्षका लागि थुनामा पठाउने आदेश दिएको थियो। अन्य तीन जनालाई भने धरौटीमा रिहा गरेको थियो।
सूचना अधिकारी शर्माका अनुसार उच्च अदालतले तत्काल उनीहरू निर्दोष हुन् भन्ने अवस्था नरहेको ठहर गर्दै जिल्ला अदालतको आदेश रीतपूर्वक नभएको निष्कर्ष निकालेको हो। त्यसैले चारै जनालाई पुर्पक्षका लागि थुनामा पठाउन आदेश गरिएको उनले बताए।
गोपाल डिभिजन वन कार्यालय वीरगञ्जमा लेखा अधिकृत पदमा कार्यरत थिए।
चैत १२ गते बेलुका घरको भान्साकोठामा गोपालले श्रीमतीमाथि चिर्पट प्रहार गरिरहँदा उनका बुवा, बहिनी र भाउजू पनि सोही घरमा थिए। बचाउका लागि कमला र उनका छोराछोरीले हारगुहार गर्दा पनि परिवारका सदस्य कसैले पनि छुटाउन वा जोगाउन प्रयास नगरेको स्थानीयले त्यतिबेलै बताएका थिए।
बालबालिका रोइरहेको सुनेर छिमेकीहरू घरमा जान खोज्दा गोपालका बुवा छतमा लाठी नचाउँदै उभिएका थिए र घरभित्र कसैलाई पनि प्रवेश गर्न नदिएको स्थानीयको आरोप थियो।
प्रहरी अनुसन्धानले पनि उक्त तथ्य पुष्टि गरेको थियो।
कमलालाई रक्ताम्य अवस्थामा उनका नाबालक छोराले घिसार्दै घरबाहिर ल्याएको देखेपछि स्थानीयले प्रहरीलाई खबर गरेका थिए। गोपाल र कमलाका एक छोरा र एक छोरी छन्।
घटनाको जानकारी पाएलगत्तै प्रहरीले कमलाको उद्धार गरी तुलसीपुरस्थित राप्ती प्रादेशिक अस्पताल पुर्याएको थियो। अस्पताल पुर्याएको केही बेरमै बेलुका करिब साढे ७ बजे उपचारका क्रममा चिकित्सकले उनलाई मृत घोषणा गरेका थिए। त्यसपछि प्रहरीले गोपाललाई नियन्त्रणमा लिएको थियो।
डिभिजन वन कार्यालय वीरगञ्जमा आउनुअघि गोपाल रुकुम पश्चिममा वडा सचिवका रूपमा कार्यरत थिए।
गोपालको पुर्ख्यौली घर रुकुम पश्चिमको त्रिवेणी गाउँपालिका–१० हो। केही वर्षअघि उनीहरूको परिवार पहाडबाट दाङ झरेर तुलसीपुर–१९ मा बसोबास गर्न थालेको थियो।
गोपाल वीरगञ्जस्थित आफ्नो कार्यालयबाट चैत १ गते बिदामा घर आएका थिए।
उही दिन उनका सहोदर भाइ १७ वर्षीय महेन्द्र वलीले रुकुम पश्चिमस्थित झोलुङ्गे पुलबाट हाम फाल्दा घटनास्थलमै मृत्यु भएको थियो। उनी रुकुममै कक्षा ११ मा अध्ययनरत थिए। उनले सामाजिक सञ्जालमा प्रेममा धोका पाएको आशयको स्टाटस लेखेका थिए।
भाइको काजकिरिया गर्न गोपाल रुकुम पश्चिम गएका थिए। काजकिरिया सकेर घटना हुनुभन्दा दुई दिनअघि अर्थात् चैत १० गते मात्र उनी तुलसीपुरस्थित घर फर्किएका थिए। घर फर्किएपछि पनि गोपाल छुट्टै कोठामा सुत्ने गरेका थिए। पछिल्लो केही समययता गोपाल र कमलाबीच सम्बन्ध राम्रो नरहेको प्रहरीले जनाएको थियो।
अनुसन्धानमा संलग्न प्रहरी अधिकारीका अनुसार हत्याको ठोस कारण नखुले पनि आपसी शंका–उपशंकाका कारण गोपालले श्रीमतीको विभत्स हत्या गरेको प्रारम्भिक निष्कर्ष थियो।
उनीहरूबीचको विवाद समाधान गर्न परिवार, नजिकका आफन्त तथा माइती पक्षले समयमै भूमिका खेल्न नसक्दा यस्तो दुःखद घटना भएको प्रहरी अधिकारीहरूको भनाइ थियो।
'अनुसन्धानबाट श्रीमान–श्रीमती दुवैको नैतिक चरित्रमा कतै पनि खोट लगाउने आधार देखिएन,' अनुसन्धानमा संलग्न एक प्रहरी अधिकारीले भनेका थिए, 'तर उनीहरूबीचको अनावश्यक शंका–उपशंका र क्षणिक आवेग नियन्त्रण गर्न नसक्दा यो दुःखद घटना भएको अनुसन्धानबाट खुलेको छ।'
तर कमलाको माइती पक्षका केही आफन्तले भने उनी यसअघि पनि पटक–पटक श्रीमानको कुटपिट र आक्रमणको शिकार भएको बताएका थिए।
उनीहरूका अनुसार श्रीमान गोपालबाट हुने यातना सहन नसकेपछि कमलाले 'बरु छोराछोरी पालेर एक्लै बस्छु' भन्ने निर्णय गर्दै अदालतमा मानाचामलको मुद्दासमेत दर्ता गरेकी थिइन्।
उक्त मुद्दा अदालतमा विचाराधीन रहेकै बेला लेखा अधिकृत गोपालले घरभित्रै श्रीमती कमलामाथि चिर्पट र रडले कुटपिट गरी विभत्स रूपमा हत्या गरेको अनुसन्धानबाट खुलेको थियो।
-1774616953.jpg)
