गृहमन्त्री सुधन गुरूङले आफ्नो गाडीमा रहेको कालो सिसा आफै ट्राफिक कार्यालय पुगेर हटाएका छन्।
सोमबार काठमाडौं उपत्यका ट्राफिक प्रहरी कार्यालय रामशाहपथ पुगेर गृहमन्त्री गुरूङले आफ्नो गाडीमा रहेको कालो सिसा हटाएका हुन्।
उनीसँगै गृहसचिव राजकुमार श्रेष्ठले पनि ट्राफिक कार्यालय गएर आफ्नो गाडीको कालो सिसा हटाएको कार्यालय प्रमुख एसपी नरेशराज सुवेदीले जानकारी दिए।
'गृहमन्त्रीज्यूले बिहान कार्यालयमा आएर कालो सिसा हटाउने अभियान मेरो गाडीबाट सुरू गर्नुस् भनेर निर्देशन दिनुभएको थियो। त्यही अनुसार उहाँले प्रयोग गर्दै आएको गाडी र गृहसचिवज्यूको गाडीको कालो सिसा हटाउने कार्य सुरू भएको छ। अब हामी निरन्तर रूपमा यसलाई अघि बढाउँछौं,' उनले भने।
पछिल्लो समय कार्यालयले कालो सिसा र सिसामा कालो टेन्टेड ग्लास राख्नेहरूलाई कारबाही गर्दै हटाउन लगाइरहेको छ।
सवारी तथा यातायात व्यवस्था ऐन २०४९ को दफा ३९ अनुसार सवारीधनीले अधिकारप्राप्त अधिकारीको स्वीकृति नलिई सवारीको रङ, सिट संख्या, स्वरूप, इन्जिन वा चेसिस परिवर्तन हुने गरी सवारीमा हेरफेर गर्न नपाइने व्यवस्था गरिएको छ।
यसरी स्वरूप परिवर्तन गर्नेलाई ट्राफिक प्रहरीले यातायात व्यवस्था विभाग पठाउने गर्छ। विभागले यसरी स्वरूप परिवर्तन गर्नेलाई १५ हजार रूपैयाँसम्म जरिवाना गर्दै आएको छ।
एसपी सुवेदीका अनुसार कालो सिसा प्रयोग गरेर स-साना हतियार ओसारपसार, लागुऔषध ओसारपसार, सुन तथा अवैध मुद्रा ओसारपसार, विभिन्न जघन्य मुद्दाका फरार अपराधीहरू लुकिछिपी हिँड्ने, विभिन्न हिंसाजन्य घटना तथा दुर्व्यवहारका घटनाहरू हुने गर्छन्।
पछिल्लो समय ३७ वटाभन्दा बढी गाडीधनीलाई कालो सिसा हटाउन लगाएर जरिवाना समेत तिराइएको छ।
