रूकुम पूर्वमा जिप दुर्घटना हुँदा ५ जना घाइते भएका छन्।
जिल्लाको सिस्ने गाउँपालिका-४ झाक्रीपोलेस्थित रूकुमकोटबाट-दादिङ खण्डको भित्री सडकमा लु १ ज २४७० को जिप दुर्घटना हुँदा ६ महिनाकी शिशुसहित ५ जना घाइते भएका हुन्।
रूकुमकोटबाट दादिङ जाँदै गरेको उक्त जिप सडकबाट करिब ३० मिटर तल खसेको जिल्ला प्रहरी प्रमुख डिएसपी खुमानन्द पाण्डेले जानकारी दिए।
घाइतेमध्ये सिस्ने गाउँपालिका – ४ दादिङकी २३ वर्षीया धनकुमार घर्ती र ६ महिनाकी सर्लाश बुढा मगरको अवस्था गम्भीर छ । उनीहरु दुबै जनालाई जिल्ला अस्पतालमा प्रारम्भिक उपचार पछि थप उपचारका लागि दाङ रिफर गरिएको छ ।
सर्लासकी आमा २७ वर्षीया रोशनी बुढा मगरको अवस्था मध्यम छ । २१ वर्षीया रमिता घर्तीको अवस्था मध्यम र चालक सिस्ने – २ किदाका २३ वर्षीय खिम्मान खड्काको अवस्था सामान्य रहेको डिएसपी पाण्डेले जानकारी दिए।
उनीहरू तीनै जना उपचारपछि डिस्चार्ज भइसकेका छन्।
जिपमा चालकसहित ११ जना सवार थिए। अन्य ६ जना सकुशल रहेको प्रहरीले जनाएको छ।
दुर्घटनाबारे थप अनुसन्धान भइरहेको प्रहरीले जनाएको छ।
