गुल्मीको तत्कालीन इस्मा गाउँ विकास समिति–१ रातामाटाका ४१ वर्षीय गोपाल कुमालले १४ वर्षअघि पहिलो श्रीमतीको हत्या गरेकै शैलीमा अहिले दोस्रो श्रीमतीको पनि निर्ममतापूर्वक हत्या गरेको तथ्य खुलेको छ।
२०६९ मंसिर १ गते साँझ करिब ५ः४५ बजे सामान्य घरायसी विवादका क्रममा गोपालले आफ्नी २६ वर्षीया श्रीमती कमला कुमालमाथि चिर्पट, लात्ती र मुक्काले निर्घात कुटपिट गरेका थिए। टाउकोमा चिर्पट प्रहार गरेपछि कमला अचेत भएकी थिइन्। श्रीमतीको मृत्यु भएको ठानेपछि गोपालले आफू जोगिन काल्पनिक कथा रच्दै कमला झुन्डिएर मरेको हल्ला गाउँभर फैलाएका थिए।
छिमेकी घटनास्थलमा पुग्दा कमला बेडनजिकै घाइते अवस्थामा लम्पसार परेकी थिइन्। गाउँलेले प्रहरीलाई खबर गरेपछि घटनास्थल पुगेको प्रहरीलाई घटनाप्रति शंका लागेको थियो। मुचुल्का तयार गरी पोस्टमर्टमका लागि जिल्ला अस्पताल तम्घास पठाउने क्रममा प्रहरीले गोपाललाई पनि नियन्त्रणमा लिएको थियो।
प्रहरी नियन्त्रणमा परेपछि पनि उनले श्रीमती झुन्डिएर मरेकी हुन्, आफूले डोरी काटेर भुइँमा झारी पानी खुवाएको मात्र हो भन्दै जोगिने प्रयास गरेका थिए। तर अनुसन्धानका क्रममा उनको भनाइ झूटो सावित भयो। पछि उनले आफ्नै बयानमा चिर्पट प्रहार गरी श्रीमती कमलाको हत्या गरेको स्वीकार गरेका थिए।
त्यसपछि उनीविरूद्ध ज्यान मुद्दा चल्यो। जिल्ला अदालत गुल्मीले २०६९ चैत ६ गते उनलाई १० वर्ष कैद सजाय सुनायो। उनले तत्कालीन पुनरावेदन अदालतमा पुनरावेदन गरे पनि जिल्ला अदालतको फैसला सदर भयो। त्यसपछि उनी जिल्ला कारागार गुल्मीमा कैद भुक्तान गर्न पुगे।
नियमअनुसार २०७९ साल चैतसम्म कैद बस्नुपर्ने भए पनि आधा सजाय भुक्तान गरेका र असल चालचलन भएका कैदीलाई विशेष अवसरमा कैद मिनाहा दिने व्यवस्थाअनुसार २०७४ जेठ १४ गते गणतन्त्र दिवसका अवसरमा बाँकी कैद मिनाहा भएपछि उनी रिहा भएका थिए।
जेलबाट छुटेपछि उनले करिब पाँच वर्षअघि मुनासँग दोस्रो विवाह गरे। मुनाबाट उनका एक नाबालक छोरा छन्। पहिलो श्रीमती कमलाको हत्यापछि कैद मिनाहा पाएर छुटेका गोपालसँग मुनाको वैवाहिक जीवन सामान्य रूपमा चलिरहेको थियो।
यसबीच इस्मा गाउँ विकास समिति–१ हाल इस्मा गाउँपालिका–५ रातामाटा बनेको थियो। स्थानको नाम मात्र परिवर्तन भएको थिएन, पहिलो श्रीमतीको हत्या गरेको अतीतबाट उम्किन गोपालले आफ्नो नाम परिवर्तन गरी ‘यमबहादुर’का नामले चिनिन थालेका थिए। यद्यपि गाउँलेहरूले उनको विगत भने बिर्सिएका थिएनन्। त्यसका बाबजुद गाउँ समाजले उनलाई स्वीकार गरेको थियो।
तर गत असार ९ गते राति करिब ९ः३० बजे फेरि सामान्य विवादकै क्रममा मदिराको नशामा रहेका गोपालले दोस्रो श्रीमती ३७ वर्षीया मुनामाथि पनि त्यही हिंस्रक व्यवहार दोहोर्याए। चिर्पट, लात्ती र मुक्काले निर्घात कुटपिट गरी उनले मुनालाई अचेत बनाएका थिए।
इस्मा गाउँपालिका–५ का वडाध्यक्ष झविन्द्र अर्यालका अनुसार त्यस दिन दिउँसोदेखि नै गोपालले मुनालाई कुटपिट र लखेटपछार गरिरहेका थिए। छुट्ट्याउन गएका छिमेकी धनबहादुर कुमालमाथि पनि उनले कुटपिट गरेका थिए। त्यसपछि धनबहादुरले नजिकैको प्रहरी चौकीमा पुगेर आफूमाथि भएको कुटपिटबारे निवेदन दिएका थिए।
दिउँसो प्रहरी गोपालको घर पुगे पनि उनी मदिराको नशामा रहेकाले सम्झाइबुझाइ गर्दै असार १० गते छलफल गर्ने भन्दै फर्किएको वडाध्यक्ष अर्यालले बताए।
तर सोही राति गोपालले श्रीमती मुनाको टाउको सहित शरीरका विभिन्न भागमा चिर्पट प्रहार गरी हत्या गरे। त्यसपछि शवलाई छिमेकीको घरनजिकै बलेसीतिर लगेर फालेर आफू घरमै गएर सुतेको तथ्य खुलेको वडाध्यक्ष अर्यालले बताए।
बिहान छिमेकी उठ्दा मुना अचेत अवस्थामा घरनजिकै भेटिएपछि प्रहरीलाई खबर गरिएको थियो।
गुल्मी प्रहरीका प्रवक्ता डिएसपी वीरेन्द्रवीर विश्वकर्माका अनुसार असार १० गते बिहान करिब ७ः३० बजे मात्रै श्रीमानले श्रीमतीमाथि कुटपिट गरेको सूचना प्रहरीलाई प्राप्त भएको थियो। त्यसपछि अस्थायी प्रहरी पोस्ट धनार्जेबाट प्रहरी वरिष्ठ हवल्दार जगनारायण केवटको नेतृत्वमा टोली घटनास्थल पुगेको थियो।
मुनाको टाउको तथा शरीरका विभिन्न भागमा गम्भीर चोट देखिएपछि तत्काल जिल्ला प्रहरी कार्यालयलाई जानकारी गराइएको थियो। जिल्ला प्रहरी प्रमुख एसपी भीमकिरण बोगटीले घाइतेलाई तत्काल अस्पताल पुर्याउन र उनका श्रीमानलाई नियन्त्रणमा लिन निर्देशन दिएका थिए।
प्रहरीले मुनालाई उद्धार गरी जिल्ला अस्पताल तम्घास पुर्याए पनि चिकित्सकले बिहान ९ः५५ बजे मृत घोषणा गरेका थिए।
वडाध्यक्ष अर्यालका अनुसार मुनाबाट गोपालका दुई वर्षका एक छोरा छन्। पहिलो श्रीमती कमलाबाट एक छोरा र एक छोरी छन्। छोरा भारतमा रोजगारीमा रहेका छन् भने छोरी छिमेकी भण्डारी परिवारको घरमा काम गर्दै पढेर हालै कक्षा १२ उत्तीर्ण गरेकी छन्।
‘घरको कमजोर आर्थिक अवस्था र बुवाको व्यवहारका कारण उनी छिमेकीको घरमा काम गर्दै पढिन् र हालसालै कक्षा १२ उत्तीर्ण गरिन्,’ वडाध्यक्ष अर्यालले भने, ‘नेपाली सेनामा जागिर खाने इच्छा व्यक्त गरेपछि केही दिनअघि मैले नै सिफारिस दिएको थिएँ।’
मुनाको हत्या गरेपछि पनि गोपाल उर्फ यमबहादुर घरमै निर्धक्क बसेका थिए। ‘ऊ साह्रै मूर्ख देखियो। मलाई कसैले केही गर्न सक्दैन भन्ने मानसिकतामा थियो,’ वडाध्यक्ष अर्यालले भने, ‘श्रीमतीको हत्या गरेर शव छिमेकीको घरनजिकै फालेपछि पनि घरमै ढुक्कले सुतेको थियो। बिहान पनि त्यहाँ जाने मानिसहरूलाई ठूलो आँखाले घुरिरहेको थियो।’
पक्राउ परेपछि भने उनले प्रहरीसमक्ष आफूलाई ‘यमबहादुर’का रूपमा चिनाएका थिए। ‘विगतको अपराध लुकाउने उद्देश्यले उनले यस्तो गरेको देखिन्छ,’ एसपी बोगटीले भने, ‘पहिलो श्रीमतीको मृत्यु पनि झुन्डिएर भएको हो भन्दै प्रहरीलाई भ्रममा पार्न खोजेका थिए। उनको व्यवहार हेर्दा उनी सिरियल किलरजस्तै देखिन्छन्।’
अनुसन्धानका क्रममा उनी यमबहादुर नभई गोपाल कुमाल नै रहेको र २०६९ सालमा पहिलो श्रीमती कमलाको हत्या गरेको तथ्य प्रहरी अभिलेखबाट खुलेको थियो।
यसरी २०६९ कात्तिक १ गते पहिलो श्रीमती २६ वर्षीया कमलाको हत्या गरेकै शैलीमा २०८३ असार ९ गते उनले दोस्रो श्रीमती ३७ वर्षीया मुनाको पनि चिर्पट प्रहार गरी क्रूरतापूर्वक हत्या गरेको तथ्य अनुसन्धानबाट खुलेको छ।
हाल प्रहरीले गोपालविरूद्ध कर्तव्य ज्यान मुद्दा चलाउने तयारी गर्दै अनुसन्धानको मिसिल तयार पारिरहेको जिल्ला प्रहरी प्रमुख एसपी बोगटीले जानकारी दिए।
