सामाजिक सञ्जालमा स्वास्थ्यमन्त्री निशा मेहतामाथि आलोचना गरेपछि पक्राउ परेका स्वास्थ्यकर्मीलाई रातभर हिरासतमा राखेर छाडिएको छ।
साइबर ब्युरोको अनुरोधमा जिल्ला प्रहरी कार्यालय धनुषाले सोमबार साँझ हेल्थ असिस्टेन्ट नवेश अधिकारी पक्राउ गरेको थियो।
उनलाई मंगलबार रिहा गरिसकेको कार्यालयका डिएसपी मधुसुदन न्यौपानेले जानकारी दिए।
उनले आफूहरूलाई ब्युरोबाट ‘उपस्थित गराउनू’ भनेर पत्र आएपछि पक्राउ गरिएको बताए।
तर फेरि ब्युरोले नै छाड्न भनेपछि रिहा गरिएको पनि उनले जानकारी दिए।
‘साइबर ब्युरोले केही कुरा बुझ्नु पर्ने छ उपस्थित गराउनु भनेको थियो। सामाजिक सञ्जालमा लेखेको विषयमा भनिएको थियो। फेरि परेन भनेकाले हामीले फिर्ता पठाइदियौं,’ उनले भने, ‘के कारणले पछि परेन भनियो थाहा भएन।’
साइबर ब्युरोले यस विषयमा केही बताएको छैन।
उनले आफ्नो सामाजिक सञ्जालमा मन्त्री महेताको तस्बिरलाई रातो अक्षरले काटेर माफिया मन्त्री लेखेका थिए। उनले प्रत्येक अस्पतालमा गरिब जनताका लागि १० प्रतिशत नि:शुल्क बेडको व्यवस्था हुनुपर्नेमा मधेसका कुनै पनि अस्पतालमा लागू गराउन नसकेको भन्दै राजीनामा समेत माग गरेका थिए।
