सरकारले त्रिपुरेश्वरको राहदानी विभाग अगाडि बिहीबार भएको घटनामा गम्भीर रूपले जलेका गणेश नेपालीको सम्पूर्ण उपचार खर्च बेहोर्दै थप विशिष्ट उपचारका लागि भारत लैजाने तयारी गरेको छ।
हाल वीर अस्पतालमा उपचाररत नेपालीलाई भारतको नयाँ दिल्लीस्थित 'अखिल भारतीय आयुर्विज्ञान संस्थान' (एम्स) लैजाने तयारी गरिएको प्रधानमन्त्री कार्यालयले जनाएको छ
२५ वर्षीय नेपालीले बिहीबार राहदानी विभाग अगाडि पेट्रोल खन्याएर आफूलाई जलाएका थिए। उनी वीर अस्पतालको आइसियूमा उपचाररत छन्। वीर अस्पतालका सूचना अधिकारी ताराबहादुर कुँवरका अनुसार उनको स्वास्थ्य अवस्था गम्भीर छ।
'६५ प्रतिशत शरीरको भाग जलिसकेको छ,' उनले भने।
बिरामीको स्वास्थ्य अवस्था बुझ्न र उपचार प्रक्रियालाई तीव्र बनाउन गृहमन्त्री सुधन गुरुङ र प्रधानमन्त्रीको सचिवालयका सदस्यहरू बिहीबारै वीर अस्पताल पुगेका थिए। उनीहरूले वीर अस्पतालका चिकित्सक टोलीसँग घाइतेको पछिल्लो स्वास्थ्य स्थिति र उपचारको प्रगतिबारे जानकारी लिएको प्रधानमन्त्री कार्यालयले जनाएको छ।
चिकित्सकहरूसँगको परामर्श र अवस्थाको गम्भीरता हेरेर बिरामीलाई तत्काल भारत लैजान प्राविधिक तथा व्यवस्थापकीय तयारी अघि बढाइएको प्रधानमन्त्री कार्यालयले जानकारी दिएको छ।
प्रधानमन्त्री बालेन शाहको पहलमा नेपालीलाई थप उपचारका लागि भारत लैजाने प्रक्रिया अघि बढाइएको पनि कार्यालयले जनाएको छ।
वीर अस्पतालका सूचना अधिकारी कुँवरले 'राहदानी विभाग अगाडि मोटरसाइकल पार्किङ गरिरहँदा महानगर प्रहरीले ह्विल लक लगाएपछि सोही बाइकको पेट्रोल निकालेर ज्यानमा खन्याएको जानकारीमा आएको' बताएका छन्।
