सर्लाहीमा एक जना युवाले आत्मदाह प्रयास गरेका छन्।
उनलाई हेलिकप्टरमार्फत् उद्धार गरी काठमाडौं पठाउने तयारी भएको छ।
सहायक प्रमुख जिल्ला अधिकारी होमप्रसाद घिमिरेका अनुसार गडैता नगरपालिका वडा नम्बर १० का विवेक मण्डलले आत्मदह प्रयास गरेका हुन्। उनले शरीरमा पेट्रोल खन्याएर आगो लगाएको जानकारी आएको छ।
‘उनलाई हेलिकप्टर मगाएर काठमाडौं पठाउने तयारी गरिएको छ,’ उनले भने, ‘घटना आज अपराह्न करिब ३ बजेतिरको हो।’
यस क्षेत्रका सांसद रास्वपाका अमरेशकुमार सिंहले ३५ वर्षका विवेक मण्डलले आत्मदाह प्रयास गरेको जानकारी आएको उल्लेख गरेका छन्।
‘निजको अवस्था नाजुक रहेकोले प्रधानमन्त्री, गृहमन्त्री र सभापतिलाई जानकारी गराएको छु, नि:शुल्क उपचारको व्यवस्था गरिदिन पनि अनुरोध गरेको छु,’ उनले सामाजिक सञ्जाल फेसबुकमा लेखेका छन्।
उनकाअनुसार मण्डलको उद्धारका लागि हेलिकप्टर पठाइएको छ।
