सुकुम्बासीले आश्रय लिइरहेको कीर्तिपुरको होल्डिङ सेन्टर शनिबार बिहानसम्म जलमग्न छ।
शुक्रबार बेलुकीदेखिको अविरल वर्षापछि बागमतीको बहाब बढेर मध्यरातमा होल्डिङ सेन्टरमा बाढी पसेको थियो। बाढी पसेपछि होल्डिङ सेन्टरमा अफरातफरी मच्चिएको थियो।
सुकुम्बासीहरूले नै एक अर्काको सामान निकाल्ने प्रयत्न गरेका थिए।
‘कहाँ जाने कसलाई भन्ने? महानगर प्रहरी २/४ दिन अगाडि नै होल्डिङ सेन्टर छाडेर हिँडेको थियो। एक जना प्रहरी मात्रै हुनुहुन्थ्यो,’ होल्डिङ सेन्टरमा आश्रय लिँदै आएकी गृभानिका थापा मगरले सेतोपाटीसँग भनिन्।
राति झन्डै २ बज्न लाग्दा मात्रै सुरक्षाकर्मी होल्डिङ सेन्टरमा पुगेर मानिसहरूको उद्धार गरेको थियो।
केही सुकुम्बासीलाई त्रिभुवन विश्वविद्यालयको स्मृति भवनमा लगिएको थियो। होल्डिङ सेन्टर भने शनिबार बिहानसम्म जलमग्न छ।
सुकुम्बासीहरू आफ्नो भिजेका सामान निकालेर रूँगिरहेका छन्।
बाढी पसेपछि सुकुम्बासीहरू रातभरि सुत्न पाएनन्। अलि अलि भएका लत्ता कपडा पनि बाढीले डुबाएपछि भिजेको लुगा फेर्न समेत पाएका छैनन्।
सबैभन्दा गाह्रो त बालबालिकालाई भएको छ।
१८ महिनाका छोरा र ५ वर्षीया छोरी सहित होल्डिङ सेन्टरमा बसेकी गृभानिका बच्चालाई न्यानोमा राख्न नपाउँदा बिरामी पो पर्ने हो कि भन्ने पीर लागेको बताउँछिन्।
सरकारले वैशाख १२ गते काठमाडौंका नदी/खोला किनारका सुकुम्बासी वस्तीमा डोजर चलाएर त्यहाँ बसिरहेकाहरूलाई कीर्तिपुर, इचंगु, खरिपाटी, बनेपा, नगरकोटका होल्डिङ सेन्टरमा राखिरहेको थियो।
तर असार ८ गते सूचना जारी गर्दै उनीहरूलाई सरकारले पाँच दिनभित्र छाड्नू भनेर सूचना जारी गर्यो। त्यसपछि सुकुम्बासीहरूले होल्डिङ सेन्टर नछाडेपछि थप तीन दिनको समय दिएको थियो।
अहिले होल्डिङ सेन्टरमा खाना र पानीको व्यवस्था समेत कटौती गरिएको छ। सुकुम्बासीहरुलाई होल्डिङ सेन्टर छाडेर जानू भन्ने सूचना भित्तामा टाँसिएको थियो।
उनीहरूलाई पुनर्स्थापनाका लागि सरकारले २५ हजार रूपैयाँ दिने भनेको छ। त्यसपछि तीन महिनासम्म मासिक १५ हजार रूपैयाँ दिने भनेर होल्डिङ सेन्टर छाड्न सरकारले उर्दी जारी गरेको थियो।
यद्यपि सबै सुकुम्बासीहरूले २५ हजार रूपैयाँ लिएका छैनन्।
काठमाडौंमा कोठा पाउन अहिले मुस्किल छ। सुकुम्बासीहरू भनेपछि अझै गेटबाटै फर्काइदिने गरेको सुकुम्बासीहरूको गुनासो छ।
त्यसकारण सुकुम्बासीहरूले होल्डिङ सेन्टर छाडेका छैनन्।
तस्बिरहरूः
-ink-1783740459.jpeg)
-ink-1783740462.jpeg)
-ink-1783740462.jpeg)
-ink-1783740459.jpeg)
