नाबालिकाको डिम्ब कारोबार गरेको आरोपमा प्रहरीले एक जना महिलालाई पक्राउ गरेको छ।
जिल्ला प्रहरी परिसर ललितपुरले एक जना महिलालाई नियन्त्रणमा लिएर अनुसन्धान अघि बढाएको हो।
अनुसन्धानका लागि प्रहरीले ललितपुरको इमाडोलमा ब्युटिसियनको रूपमा काम गर्दै आएकी लमजुङकी राधिका गोतामेलाई पक्राउ गरेको छ।
उनलाई प्रहरीले साउन १ गते पक्राउ गरेको थियो। १७ वर्षकी किशोरीलाई आर्थिक प्रलोभनमा पारी ग्वार्कोस्थित बिएन्डबी अस्पतालको आइभिएफमा डिम्ब झिकेको आरोप छ।
उनले डिम्ब झिकेबापत ३० हजार रुपैयाँसमेत प्राप्त गरेको प्रहरी समक्षको बयानमा बताएको एसपी गौतम मिश्रले जानकारी दिए।
डिम्ब झिकेपछि किशोरी बिरामी परेपछि प्रहरी कहाँ उजुरी लिएर आएको एसपी मिश्रले बताए।
‘चिनेको साथीले राधिकालाई भेटाइदियो। राधिकाले लगेर झिक्न लगायो भन्ने कुरा आएको छ। यसबारेमा अनुसन्धान हुँदैछ,’ एसपी मिश्रले भने।
घटनामा संलग्न चिकित्सकसहित अन्यको प्रहरीले खोजी गरिरहेको छ। अहिले प्रहरीले मानव बेचबिखनको कसुरमा अनुसन्धान गरिरहेको हो।
यसअघि पनि प्रहरीले नाबालिकाको डिम्ब तस्करी गरेको अभियोगमा अनुसन्धान अघि बढाएको थियो। तर महान्यायाधिवक्ता कार्यालयबाट मुद्दा नचलाउने निर्णय भएपछि तत्कालीन महान्यायाधिवक्ता सबिता भण्डारी विवादमा तानिएकी थिइन्।
