सुनसरीलगायत तराईका विभिन्न जिल्लामा देखिएको विवाद मत्थर पार्न राजनीतिक तहमा प्रयास जारी रहेका बेला स्थानीय सरकार, प्रशासन तथा सर्वसाधारणले पनि शान्ति र सद्भाव कायम राख्ने प्रयास जारी राखेका छन्।
सुनसरीको देवानगञ्ज गाउँपालिका–३ कप्तानगञ्जमा भएको घटनाको विरोध तथा त्यसबाट तराईका विभिन्न जिल्लामा उत्पन्न असहज परिस्थितिलाई सामान्य बनाउन ठाउँ–ठाउँमा शान्तिपूर्ण पहल भइरहेको छ।
सुनसरीमा दुई र सिराहामा एक गरी तीन जनाको ज्यान गइसकेको घटनाको असर तराईका धेरै क्षेत्रमा परेको छ भने यसैको विरोधमा कोशी प्रदेशको मोरङ विराटनगरसहित मधेस प्रदेशका जलेश्वर, गौशाला बजार बन्द छन्।
धेरै ठाउँमा यातायात सेवासमेत अवरूद्ध भएको प्रहरीले जानकारी दिएको छ।
यही अवस्थाबीच परिस्थिति थप बिग्रन नदिन र धार्मिक तथा सामाजिक सद्भाव कायम राख्न विभिन्न स्थानमा सर्वपक्षीय बैठक तथा सद्भाव र्यालीहरू भइरहेका छन्।
सप्तरीको खडक नगरपालिकास्थित कल्याणपुर बजारमा हिन्दु र मुस्लिम समुदायको समेतको सहभागितामा ‘सामाजिक सद्भाव कायम गरौं, आपसी भाइचारा बढाऔं’ भन्ने नारासहित सद्भाव रर्याली सम्पन्न भएको छ।
मोरङमा सद्भाव कायम राख्न आज अपराह्न ३ बजे विराटनगर महेन्द्र चोकबाट जिल्ला प्रशासन कार्यालयसम्म सद्भाव र्यालीको तयारी गरिएको छ।
धनुषामा पनि अवस्था सहज बनाउन प्रतिनिधि सभा सदस्यसहितको सर्वदलीय र सर्वपक्षीय बैठक आयोजना गरिएको जिल्ला प्रशासनले जानकारी दिएको छ।
सुरक्षा स्थितिलाई मध्यनजर गर्दै धनुषाको जनकपुरधाम उपमहानगरपालिका लगायतका केही क्षेत्रमा तथा सप्तरीको राजविराज र बोदेबरसाईन नगरपालिकामा अनिश्चितकालीन कर्फ्यू आदेश जारी गरिएको छ।
सुनसरीको कप्तानगञ्ज घटनामा सरकार र पीडित परिवारबीच सात बुँदे सहमति भए पनि देवानगन्जसहितका क्षेत्रमा कर्फ्यू निरन्तर छ।
देवानगन्ज घटनाका घाइते मिथिलेश मेहताका काका रामनारायण मेहताले दिएको जानकारी अनुसार सरकारसँग भएको सहमतिपछि देवानगन्जमा प्रदर्शन रोकिएको छ।
शुक्रबार बिहानैदेखि कप्तानगन्जको अवस्था शान्तिपूर्ण रहेको उनले जानकारी दिए।
