गृहमन्त्रीकी आमा भनेर एक महिलाको भिडिओ हालेको भन्दै प्रहरीले पक्राउ गरेका चलचित्र पत्रकार शालिकराम न्यौपानेसहित तीनै जना छुटेका छन्।
जिल्ला प्रहरी परिसर काठमाडौंले न्यौपाने, कालिकोटका छत्र बोगटी र दोलखाका नवरत्न तामाङलाई मंगलबार पक्राउ गरेको थियो। उनीहरू तीनै जनालाई बुधबार साँझ हाजिर जमानीमा छाडेको हो।
प्रहरीका अनुसार ४९ वर्षीय महिलाले वैयक्तिक गोपनीयतासम्बन्धी कसुरमा निवेदन दिएपछि न्यौपानेसहित तीन जनालाई पक्राउ गरेको हो।
उनलाई जिल्ला अदालत काठमाडौंले ५ दिन हिरासतमा राख्न अनुमति दिएको थियो।
सामाजिक सञ्जालमा सार्वजनिक भएको भिडिओमा महिलाले आफू गृहमन्त्री सुधन गुरूङकी आमा भएको दाबी गरेकी छन्। यस विषयमा यकिन भने भइसकेको छैन।