काठमाडौंको चन्द्रागिरिमा मोटरसाइकल दुर्घटना हुँदा चालकको मृत्यु भएको छ।
चन्द्रागिरि नगरपालिका–८ स्थित एपीएफ एकेडेमी गेट नजिकै मोटरसाइकल दुर्घटना हुँदा चालकको मृत्यु भएको छ भने पछाडि सवार व्यक्ति घाइते भएका छन्।
प्रहरीका अनुसार शुक्रबार साँझ करिब ६ बजे मकवानपुरबाट सतुङ्गलतर्फ आउँदै गरेको बा.प्र.०२-०२० प २७६६ नम्बरको मोटरसाइकल अनियन्त्रित भएर सडकबाट करिब १० मिटर तल खसेको थियो।
दुर्घटनामा मोटरसाइकल चालक कञ्चनपुरको बेलौरीका २५ वर्षीय रमेश चौधरी र पछाडि सवार कञ्चनपुरको पुनर्वास नगरपालिका–६ घर भई हाल कीर्तिपुर बस्दै आएका ४३ वर्षीय मेकबहादुर वाइबा घाइते भएका थिए।
प्रहरीले दुवै जनालाई उद्धार गरी उपचारका लागि सतुङ्गलस्थित एपीएफ अस्पताल पठाएको थियो।
उपचारका क्रममा साँझ ७ बजे चिकित्सकले चौधरीलाई मृत घोषणा गरेका थिए।
वाइबाको अवस्था मध्यम रहेको प्रहरीले जनाएको छ। दुर्घटनाबारे थप अनुसन्धान भइरहेको प्रहरीले जनाएको छ।