दैलेखमा श्रीमानको बञ्चरो प्रहारबाट घाइते भएकी श्रीमतीको पनि मृत्यु भएको छ।
यसअघि शनिबारै उनका एक छोरा र एक छोरीको मृत्यु भएको थियो।
घटनामा आमा र दुई सन्तान गरी तीन जनाको मृत्यु भएको छ।
बञ्चरो प्रहारबाट घाइते चार जनामध्ये ६ वर्षीय बालकको उपचार जारी छ। उनको पनि अवस्था गम्भीर रहेको प्रहरीले जनाएको छ।
बञ्चरो प्रहारबाट गम्भीर घाइते भएकी ३५ वर्षीया मनिषा सलामी मगरलाई कर्णाली प्रदेश अस्पताल सुर्खेत पुर्याएलगत्तै चिकित्सकले मृत घोषणा गरेका हुन्।
जिल्ला प्रहरी कार्यालय दैलेखका प्रवक्ता प्रहरी निरीक्षक ऋषिकेश गौतम हरिजनका अनुसार शनिबार दिउँसो २ बजेपछि चिकित्सकले उनलाई मृत घोषणा गरेका थिए।
बिहान ११ बजेतिर उनका १२ वर्षीय छोरा तपेन्द्र सलामी र ३ वर्षीया छोरी करिस्मा सलामीलाई नगर अस्पताल दुल्लुले मृत घोषणा गरेको थियो।
बुवाको बञ्चरो प्रहारबाट गम्भीर घाइते भएका ६ वर्षीय छोरा मिलन सलामीको सुर्खेतमा उपचार भइरहेको छ।
उनलाई थप उपचारका लागि बाँकेको नेपालगञ्ज पठाउने तयारी भइरहेको प्रहरीले जनाएको छ।
जिल्लाको चामुन्डा बिन्दासैनी नगरपालिका–३ पानीखोलाका ३८ वर्षीय अम्बर सलामी मगरले सामान्य घरायसी विवादका क्रममा शनिबार बिहान साढे ९ बजेतिर श्रीमती र तीन सन्तानमाथि बञ्चरो प्रहार गरेका थिए।
घटनापछि प्रहरीले अम्बरलाई नियन्त्रणमा लिएको थियो।
उनको टाउकोमा पनि एक इन्चभन्दा गहिरो चोट रहेको प्रहरीले जनाएको छ।
उपचारका लागि अस्पताल लगिएका उनीसँग प्रहरीले सामान्य सोधपुछ गरेको छ।
सोधपुछका क्रममा उनले आफूले केही नगरेको दाबी गर्ने गरेको प्रहरीको भनाइ छ। उनीसँग थप सोधपुछ हुन बाँकी रहेको प्रहरीले जनाएको छ।
घटनाबारे थप अनुसन्धान भइरहेको जिल्ला प्रहरी कार्यालय दैलेखले जनाएको छ।