चितवन राइनोज वुमेन्स च्याम्पियन्स लिग (डब्लुसिएल) को फाइनलमा पुगेको छ। चितवन समूह चरणका चारै खेल जित्ने फाइनल पुगेको हो।
यता समूहमा दोस्रो भएको क्याट क्विन्स काठमाडौं र तेस्रो भएको विराटनगर टाइटन्सबीच इलिमिनेटरमा प्रतिस्पर्धा हुने भएको छ। जित हात पार्ने टिमले उपाधिका लागि चितवनसँग प्रतिस्पर्धा गर्नेछ। काठमाडौं ३ र विराटनगर २ खेलमा विजयी भए।
यता ललितपुर फाल्कोन्स र पोखरा पल्टन भने समूह चरणबाटै बाहिरिएका छन्। दुवै टिम सुरुवाती तीनै खेलमा पराजित भएका छन्। दुई बीच सोमबार हुने खेल औपचारिकतामै सीमित हुनेछ।
आइतबार चितवनले लगातार चौथो जित निकाल्ने क्रममा विराटनगरलाई ५३ रनले हरायो। पहिले ब्याटिङ गरेको चितवनले ८ विकेटको क्षतिमा १२२ रन जोड्यो। उसका लागि काजल श्रेष्ठले ३६ रन र कञ्चन श्रेष्ठले ३४ रन बटुले।
कप्तान इन्दु बर्माले नटआउट १७ रन जोडिन्। बलिङमा विराटनगरकी सबनम राईले २ विकेट लिइन्।
१२३ रनको लक्ष्य पछ्याएको विराटनगर ६९ रनमा अलआउट भयो। उसका लागि ज्योती पान्डे र डोली भट्टले समान २१–२१ रन जोडे।
बलिङमा चितवनकी कविता गौतमले ३ विकेट हात पारिन्। सुमन खतिवडाको नाममा २ विकेट रह्यो।