दुई वर्षअघि आजकै दिन नेपालका लेगस्पिनर सन्दीप लामिछानेले इण्डियन प्रिमियर लिग (आइपिएल) मा डेब्यू गर्ने अवसर पाएका थिए।
सुरुवाती खेलमा मौका पाउन नसकेका सन्दीपले आफ्नो टिम दिल्ली डेयरडेभिल्स (अहिले दिल्ली क्यापिटल) प्लेअफ पुग्नबाट बन्चित भइसकेको अवस्थामा रोयल च्यालेन्जर्स बैंग्लोरविद्धको खेलमा खेल्ने मौका पाएका थिए। जससँगै आइपिएलमा छनोट हुने पहिलो नेपाली खेलाडी बनेका सन्दीप आइपिएल खेल्ने पनि पहिलो नेपाली नै बनेका थिए।
दिल्लीस्थित फिरोज शाह कोटला रंगशालामा सन्दीपले ४२ हजार दर्शकका अघि विश्वकै उत्कृष्ट ब्याट्सम्यानहरू विराट कोहली र एबी डिभिलियर्सविरुद्ध बलिङ गरेका थिए।
उनले आफ्नो पहिलो ओभरमा मात्र दुई रन खर्चिएका थिए। त्यसपछि उनले पार्थिव पटेललाई एलबिडब्लूको धरापमा पारेर आइपिएलमा पहिलो विकेट हात पारेका थिए। त्यसअघि उनले ओभरको पहिलो बलमा डिभिलियर्सविरुद्ध एलबिडब्लूको अपिल गरेका थिए।
डिभिलियर्स समेत उनको बलिङबाट प्रभावित भएका थिए।
बैंग्लोरविरुद्धको खेलपछि उनले कहिल्यै पछाडि फर्केर हेर्नु परेन। उनले विश्वभरका टी-२० फ्रेञ्चाइज लिग खेल्ने अवसर पाए। अस्ट्रेलियाको बिग ब्यासदेखि वेस्ट इन्डिजको सिपिएलसम्म उनले आफ्नो प्रभाव छाडे। पाकिस्तान सुपर लिगदेखि युएईको टी-१० खेले। नाम र दाम मनग्य कमाए।
दिल्लीका लागि डेब्यू गरेको दुई वर्ष पुगेको दिन मंगलबार उनी दिल्लीको इन्स्टाग्राममा प्रत्यक्ष प्रशारणमा आए। कोरोनाभाइसका कारण संसार लकडाउन भएकाले दिल्लीले आफ्ना खेलाडीहरुसँग इन्टरनेटमार्फत कुराकानी गरिरहेको छ। यहि क्रममा दिल्लीले सन्दीपसँग मंगलबार कुरा गरेको हो।
मंगलबार भएको प्रत्यक्ष अन्तर्वार्तामा सन्दीपले आफ्नो खेल जीवनको बारेमा लामो कुरा गरेका छन्। उनले आफ्नो क्रिकेट यात्रादेखि संगितप्रतिको लगावबारे आफ्ना फ्यानलाई जानकारी दिए।
पुबुदु दासानायकेले देखेको प्रतिभासहित माइकल क्लार्कसँगको भेटले आफ्नो यात्रा अघि बढेको सन्दीपले बताए। साथै उनले यु-१९ विश्वकप गरेको प्रदर्शनदेखि आइपिएसम्मको यात्रा पनि बृस्तित कुरा गरेका छन्।
यसक्रममा सन्दीपले आफूलाई मनपर्ने ब्याट्सम्यानमा भारतका सचिन तेन्दुलकर र मनपर्ने बलरमा अस्ट्रेलियाका सेन वान भएको बताए। नेपालको मन पर्ने क्रिकेटरमा उनले पूर्वकप्तान पारस खड्काको नाम लिए। उनले भने,'मलाई नेपालको मन पर्ने खेलाडीमा पारस खड्का भएकोमा कुनै शंका छैन।'
कुराकानीकै क्रममा उनले आफूलाई बलिङ गर्न अप्ठेरो लाग्ने ब्याट्सम्यानको नाम लिए। उनले इंग्ल्यान्डका ब्याट्सम्यान टम बनटनविरुद्ध बलिङ गर्दा आफूलाई असजिलो हुने बताए।
'त्यस्तो मलाई बलिङ गर्न अप्ठेरो लाग्ने धेरै ब्याट्सम्यान त छैनन्। एक ब्याट्सम्यान भने छन्। उनी टम बनटन हुन्। उनी प्रतिभाशाली युवा खेलाडी हुन्। मैले दुई तीन पटक उनीविरुद्ध बलिङ गरेको छु,' सन्दीपले भने।
'उनका लागि कस्तो खालका बलिङ र फिल्ड सेट गर्ने भनेर सोच्नुपर्छ। उनी स्विप, रिभर्स स्विप, प्याडल स्विप हान्न सक्छन्। उनले मैदानको जुनसुकै भागमा बल हान्न सक्छन्। उनी स्पिन मात्र होइन फास्ट बलरलाई पनि खेल्न सक्छन्। १५० प्रति घन्टा किलोमिटरको गतिमा बल फ्याँके पनि उनले रिभर्स स्विप हान्छन्। उनी फरक किसिमका प्रतिभा हुन्।'
इंग्ल्यान्डका २१ वर्षीय ओपनिङ ब्याट्सम्यान बनटनविरुद्ध सन्दीपले सिजनको बिग ब्यासमा खेलेका थिए। ब्रिसबेन हिटका ओपनिङ ब्याट्सम्यानविरुद्ध सिजन उनले डिसेम्बर २० मा बलिङ गरेका थिए।
सन्दीपले दोस्रो ओभरमै बलिङ गर्दा बनटनले १९ रन प्रहार गरेका थिए। जसक्रममा उनले सन्दीपविरुद्ध तीन चौका र एक छक्का हिर्काएका थिए। आफ्नो दोस्रो ओभरको स्पेलमा भने सन्दीपले बनटनलाई बाउन्ड्री प्रहार गर्न दिएका थिएनन्।