कञ्चनपुरमा गत आइतबार साँझ मिनिट्रकले मोटरसाइकललाई ठक्कर दिँदा घाइते भएका राष्ट्रिय क्रिकेटर ललित भण्डारीलाई सहयोग गर्न क्रिकेट प्लेयर्स एसोसिएसन, नेपाल (सिप्यान) ले अपील गरेको छ।
सिप्यानले मंगलबार विज्ञप्ती निकाल्दै घटनाले स्तब्ध भएको जनाएको छ।
सुरूमा धनगढीमा उपचार गराएका भण्डारीलाई त्यसपछि बाँकेको कोहलपुर मेडिकल कलेजमा लगिएको थियो।
थप उपचारका लागि भण्डारीलाई सोमबार दिउँसो हेलिकोप्टरबाट काठमाडौं ल्याइएको थियो। हाल ग्राण्डी इन्टरनेसनल अस्पतालमा उपचार गराइरहेका भण्डारी खतरामुक्त छन्।
भण्डारीलाई काठमाडौं ल्याउन तथा उपचारमा सहयोग गर्ने अस्पताल, क्रिकेटर, शुभेच्छुकलगायत सम्पूर्णमा सिप्यानले कृतज्ञता ज्ञापन गरेको छ।
भण्डारीको उपचारका लागि सम्पूर्ण सहयोग गर्न प्रतिबद्ध सिप्यानले सहयोग गर्न सम्पूर्णमा अपील गर्दछौं।
इच्छुकलाई सिप्यानको सेञ्चुरी कमर्सियल बैंक लिमिटेड, पुतलीसडक शाखा काठमाडौँमा रहेको खाता नम्बर ०० १००० २५२९ CA रकम जम्मा गर्न आह्वान समेत गरिएको छ।
