दक्षिण अफ्रिकाका पूर्व ब्याटर फा डु प्लेसिसले इन्डियन प्रिमियर लिग (आइपिएल) २०२६ को अक्समा आफ्नो नाम दर्ता नगर्ने निर्णय गरेका छन्। यसको सट्टा उनले पाकिस्तान सुपर लिग (पिएसएल) खेल्ने रोजेका छन्।
डु प्लेसिसले आफ्नो सामाजिक सञ्जालमा एक विज्ञप्ति जारी गर्दै लेखेका छन्, ‘आइपिएलमा १४ सिजन बिताएपछि, मैले यो वर्ष अक्सनमा आफ्नो नाम नराख्ने निर्णय गरेको छु। यो एउटा ठूलो निर्णय हो, र पछाडि फर्केर हेर्दा म असाध्यै कृतज्ञ छु।’ आइपिएलमा १५४ खेल खेलिसकेका डु प्लेसिसले भविष्यमा पुनः यो प्रतियोगितामा फर्कने सम्भावनालाई भने नकारेका छैनन्।
उनले भनेका छन्, ‘यो लिग मेरो यात्राको एक ठूलो हिस्सा रह्यो। विश्वस्तरीय खेलाडीसँग, उत्कृष्ट फ्रेन्चाइजीहरूका लागि र अतुलनीय जोस भएका फ्यानहरूका अगाडि खेल्न पाउनु मेरो भाग्य हो। भारतले मलाई मित्रता, पाठ र सम्झनाहरू दिएको छ जसले मलाई एक क्रिकेटर र व्यक्तिको रूपमा आकार दिएको छ।’
उनले थपे, ‘१४ वर्ष लामो समय हो, र यो अध्यायले मेरो लागि जो अर्थ राख्छ त्यसमा मलाई गर्व छ। भारत मेरो हृदयको विशेष ठाउँमा छ र यो पक्कै पनि बिदाइ होइन - तपाईंहरूले मलाई फेरि देख्नुहुनेछ।’
पीएसएलमा जाने निर्णयबारे उनले भने, ‘यो वर्ष मैले नयाँ चुनौती स्वीकार गर्ने निर्णय गरेको छु र म आगामी पीएसएल सिजन खेल्नेछु। यो मेरो लागि रोमाञ्चक कदम हो - केही नयाँ अनुभव गर्ने, खेलाडीको रूपमा विकास गर्ने, र प्रतिभा तथा ऊर्जाले भरिएको लिगलाई अँगाल्ने अवसर हो। नयाँ देश। नयाँ वातावरण। नयाँ चुनौती। म पाकिस्तानको आतिथ्यको पर्खाइमा छु।’
आईपीएल २०२५ मा डु प्लेसिसले दिल्ली क्यापिटल्सका लागि ९ खेलमा २०२ रन बनाएका थिए। नियमित कप्तान अक्षर पटेल घाइते हुँदा उनले दुई खेलमा टोलीको कप्तानी समेत सम्हालेका थिए। यद्यपि, अक्सन अघि उनलाई रिलिज गरेको थियो।
समग्रमा, डु प्लेसिस आईपीएलमा विदेशी खेलाडीहरूमध्ये चौथो सर्वाधिक रन बनाउने खेलाडी हुन्। दिल्ली बाहेक, उनले चेन्नई सुपर किंग्स, रोयल च्यालेन्जर्स बैंगलुरु र राइजिङ पुणे सुपरजायन्ट्सका लागि खेलिसकेका छन्। उनले चेन्नई सुपर किंग्ससँग दुई पटक उपाधि समेत जितेका छन्।
डु प्लेसिसले यसअघि पनि पीएसएल खेलिसकेका छन्। सन् २०१९ देखि २०२१ को बीचमा उनले पेशावर जाल्मी र क्वेटा ग्ल्याडिएटर्सका लागि ६ खेल खेलेका थिए।
आइपिएल सिजन मार्च र मे महिनाको बीचमा हुने भए पनि, यसको समय पीएसएलसँग जुध्नेछ, जुन अप्रिल र मे महिनामा निर्धारित गरिएको छ।
प्लेसिस सिजनको नेपाल प्रिमियर लिग खेल्न पनि आउँदैछन्। उनी विराटनगर किंग्सका लागि लिगका अन्तिम दुई बाँकी रहदा आउने बताइएको छ।