अस्ट्रेलियाको क्विन्सल्यान्ड राज्यमा आयोजना हुँदै आएको गोल्ड कोस्ट नेपाली प्रिमियर लिग (जीसीएनपीएल) को तेस्रो संस्करणका लागि खेलाडी दर्ता खुला गरिएको छ।
अस्ट्रेलियामा रहेका नेपाली क्रिकेट खेलाडीको प्रतिभा विकास, प्रतिस्पर्धात्मक क्रिकेटको प्रवर्द्धन तथा नेपाली समुदायबीच खेलकुदमार्फत एकता अभिवृद्धि गर्ने उद्देश्यले आयोजना हुँदै आएको प्रतियोगिताको तेस्रो संस्करण सन् २०२७ को मार्चमा सञ्चालन गर्ने तयारी गरिएको छ।
गोल्ड कोस्ट नेपाली प्रिमियर लिगको आयोजनामा हुने यस प्रतियोगितामा यसपटक पाँच फ्रेन्चाइज टोलीले प्रतिस्पर्धा गर्नेछन्। अघिल्ला दुई संस्करणको सफलतापछि तेस्रो संस्करणलाई थप व्यावसायिक, प्रतिस्पर्धात्मक र आकर्षक बनाउने लक्ष्य आयोजकले राखेको छ।
पाँच फ्रेन्चाइज टोलीबीच प्रतिस्पर्धा
यस संस्करणमा हिमालयन हिट, यति स्ट्राइकर्स, गोल्ड कोस्ट सुपर किंग्स, गोर्खा थन्डर्स र नयाँ टोली सगरमाथा टाइटन्स सहभागी हुनेछन्।
प्रतियोगिताका लागि खेलाडी छनोट अक्सन प्रणालीमार्फत गरिनेछ। खेलाडी अक्सन आगामी डिसेम्बर २०२६ को दोस्रो साता आयोजना गर्ने तयारी छ।
स्थानीय खेलाडीलाई विशेष प्राथमिकता
आयोजकका अनुसार यस संस्करणमा गोल्ड कोस्टका स्थानीय नेपाली क्रिकेट खेलाडीलाई विशेष प्राथमिकता दिइएको छ।
प्रत्येक फ्रेन्चाइज टोलीले रिटेन गरिएका खेलाडीसहित कम्तीमा ६ जना गोल्ड कोस्टका स्थानीय खेलाडी समावेश गर्नुपर्नेछ। त्यस्तै, प्रत्येक खेलको प्लेइङ–११ मा कम्तीमा चार जना स्थानीय खेलाडी अनिवार्य रूपमा समावेश हुनुपर्ने व्यवस्था गरिएको छ।
यस व्यवस्थाले स्थानीय प्रतिभालाई उच्चस्तरीय प्रतियोगितामा खेल्ने अवसर प्रदान गर्नुका साथै नयाँ खेलाडीलाई आफ्नो क्षमता प्रदर्शन गर्न प्रोत्साहित गर्ने आयोजकको विश्वास छ।
क्विन्सल्यान्डभरिका योग्य नेपाली क्रिकेट खेलाडीले प्रतियोगिताका लागि दर्ता गर्न सक्नेछन्। यसका साथै, प्रत्येक फ्रेन्चाइज टोलीले क्विन्सल्यान्डबाहिरबाट बढीमा एक जना खेलाडी अनुबन्ध गर्न पाउने व्यवस्था पनि गरिएको छ।
टर्फ विकेटमा खेल, व्यावसायिक प्रत्यक्ष प्रसारण
जीसीएनपीएल सिजन–३ लाई थप व्यवस्थित र प्रतिस्पर्धात्मक बनाउन यसपटक टर्फ विकेट भएको मैदानमा खेल सञ्चालन गर्ने योजना बनाइएको छ।
प्रतियोगिताका खेल व्यावसायिक रूपमा प्रत्यक्ष प्रसारण गर्ने, सामाजिक सञ्जालमार्फत व्यापक प्रचारप्रसार गर्ने तथा खेलाडीको प्रदर्शनलाई अन्तर्राष्ट्रिय दर्शकमाझ पुर्याउने तयारी भइरहेको आयोजकले जनाएको छ।
नेपाली राष्ट्रिय क्रिकेट टोलीका चर्चित खेलाडी अविनाश बोहरालाई प्रतियोगिताको ब्रान्ड एम्बेसडर तथा सामाजिक सञ्जालमा लोकप्रिय हिरोशी खनाललाई सिजन–३ को आधिकारिक फेसका रूपमा प्रस्तुत गरिएको छ।
नेपाली क्रिकेटलाई नयाँ उचाइमा पुर्याउने लक्ष्य
जीसीएनपीएलका निर्देशक किशोर तिवारीले तेस्रो संस्करण नेपाली क्रिकेट खेलाडीका लागि महत्वपूर्ण अवसर हुने बताएका छन्।
उनले भने, “हाम्रो उद्देश्य एउटा क्रिकेट प्रतियोगिता आयोजना गर्नु मात्र होइन, अस्ट्रेलियामा रहेका नेपाली क्रिकेट प्रतिभालाई बलियो प्लेटफर्म उपलब्ध गराउनु पनि हो। विशेषगरी गोल्ड कोस्ट र क्विन्सल्यान्डका स्थानीय खेलाडीलाई प्राथमिकता दिएर उनीहरूको प्रतिभा उजागर गर्न चाहन्छौँ।”
तिवारीले अघिल्ला दुई संस्करणबाट प्राप्त अनुभवका आधारमा यसपटक प्रतियोगितालाई अझ व्यावसायिक, व्यवस्थित र रोमाञ्चक बनाउने तयारी भइरहेको बताए।
“सम्पूर्ण योग्य नेपाली क्रिकेट खेलाडीलाई समयमै दर्ता गरी यस अवसरको सदुपयोग गर्न आग्रह गर्दछु,” उनले भने।
अनलाइनमार्फत खेलाडी दर्ता गर्न सकिने
जीसीएनपीएल सिजन–३ मा सहभागी हुन इच्छुक खेलाडीले आयोजकको आधिकारिक वेबसाइटमार्फत अनलाइन दर्ता गर्न सक्नेछन्।
खेलाडी दर्ता लिंक: https://gcnpl.com/register
आयोजकले गोल्ड कोस्ट, ब्रिसबेनलगायत क्विन्सल्यान्डका विभिन्न क्षेत्रमा रहेका नेपाली क्रिकेट खेलाडीलाई दर्ता प्रक्रियामा सहभागी हुन आह्वान गरेको छ।
जीसीएनपीएल सिजन–३ ले अस्ट्रेलियामा नेपाली क्रिकेटको पहिचान थप मजबुत बनाउनुका साथै खेलाडी, समर्थक, व्यवसायी तथा नेपाली समुदायलाई एउटै खेलकुद मञ्चमा जोड्ने अपेक्षा गरिएको छ।