नेपाली राष्ट्रिय फुटबल टिमका खेलाडी, प्रशिक्षक र अखिल नेपाल फुटबल संघ (एन्फा)का पदाधिकारीसहित ७० जनाको कोरोना भाइरसको पिसिआर परीक्षण गरिने भएको छ।
फिफा विश्वकप २०२२ र एएफसी एसियन कप २०२३ छनोट प्रतियोगिताको तयारीका लागि एन्फाले खेलाडी, प्रशिक्षक र पदाधिकारीको पिसिआर परीक्षण गर्नका लागि राष्ट्रिय खेलुकद परिषद्मार्फत इपिडेमियोलोजी तथा रोग नियन्त्रण महाशाखामा बिहीबार निवेदन दिएको छ।
खेलाडी, प्रशिक्षक र पदाधिकारीको परीक्षण केहि दिनमा हुने महाशाखाले जनाएको छ। राष्ट्रिय टिमका कतिपय खेलाडी काठमाडौं बाहिर रहेकाले उनीहरुको परीक्षण गर्न केहि ढिलाई हुनेछ।
यसअघि एन्फाले साउन पहिलो सातादेखि नेपाली टिमको तयारीका लागि पिसिआर परीक्षण गराउने निर्णय गरेको थियो।
छनोट संचालन गर्ने विषयमा गत असार ५ गते खेलाडी, प्रशिक्षक र एन्फाका पदाधिकारीबीचि भिडियो कन्फरेन्समार्फत छलफल भएको थियो। छलफलले फिफा र डब्लूएचओ गाइडलाइन्समा आधारित रहेर साउन पहिलो सातादेखि नेपाली टिमको अभ्यास गर्ने निर्णय गरेको थियो।
अब हाल स्विडेनमा प्रशिक्षण योहान कालिन नेपाल फर्कने बताइएको छ।
यसअघि कोरोना भाइरसका कारण स्थगित भएको छनोट खेलहरू आगामी अक्टोबर र नोभेम्बरमा गराउने एसियाली फुटबल महासंघ (एएफसी) ले प्रस्ताव गरेको थियो। स्थगित भएका ती खेलहरू आगामी अक्टोबर ८ र १३ तथा नोभेम्बर १२ र १७ मा गर्न प्रस्ताव छ।
दोस्रो चरणको छनोटमा 'चार म्याच डे' का खेल बाँकी भए पनि नेपालले भने तीन खेल खेल्न बाँकी छ। तीन वटै खेल नेपालले घरेलु मैदान दशरथ रंगशालामा खेल्नेछ।
प्रस्ताव गरेको नयाँ मितिलाई फिफाले अनुमती दिए नेपालले अक्टोबर ८ मा चाइनिज ताइपेई, अक्टोबर १३ मा अस्ट्रेलिया र नोभेम्बर १२ मा जोर्डनसँग खेल्नेछ।
छनोट खेलअन्तर्गत समूहमा पाँच खेल खेलेको नेपालले तीन अंक मात्र जोडेको छ। चाइनिज ताइपेइलाई पराजित गरेको नेपाल समूह बीमा चौथो स्थानमा छ।
