फ्रेञ्च लिग वानको साविक विजेता पेरिस सेन्ट जर्मेन (पिएसजी) र मार्सेलीबीचको आइतबारको खेल तनावपूर्ण बन्यो।
खेलमा पिएसजीका ब्राजिलियन फरवार्ड नेइमारसहित पाँच खेलाडीले रातो कार्ड पाए। लगातार दोस्रो खेलमा पराजित हुने क्रममा पिएसजीले घरेलु मैदानमा १-० को हार बेहोर्यो।
दोस्रो हाफको इन्जुरी टाइम सकिन लाग्दा दुवै टिमका खेलाडी झगडामा उत्रिएका थिए। हार नजिक पुगेको पिएसजीका खेलाडीमाथि मार्सेलीका खेलाडीले फल गरेपछि झगडा सुरु भएको थियो।
झगडामा उत्रिएका नेइमारसँगै पिएसजीका कुर्जावा र पारेडेस गरी तीन खेलाडीले रातो कार्ड पाए। मार्सेलीका अमाभी र बनेडेटोलाई पनि रेफ्रीले रातो कार्ड देखाउँदै मैदान बाहिर पठाएका थिए।
सुरुमा चार खेलाडीलाई रातो कार्ड दिइएको थियो। नेइमारलाई रातो कार्ड दिन रेफ्रीले भारको सहायता लिएका थिए।
भारमा रिप्ले हेर्दा झगडाका क्रममा नेइमारले मार्सेलीका गोन्जालेजलाई टाउको पछाडि प्रहार गरेको देखिएको थियो। त्यहीँ आधारमा रेफ्रीले नेइमारलाई रातो कार्ड देखाए।
रातो कार्ड पाएर मैदान बाहिर जाँदै गर्दा नेइमारले आफूमाथि रंगभेदी टिप्पणी भएको जानकारी फोर्थ अफिसियललाई दिएका थिए।
पछि नेइमारले सामाजिक सञ्जाल ट्वीटरमा गोन्जालेजप्रती संकेत गर्दै उसको मुखमा नहानेकोमा पछुतो लागेको लेखेका थिए।
एक घन्टापछि नेइमारले अर्को पोस्ट गरेका थिए। सो पोस्टमा नेइमारले भारमा आफ्नो आक्रमक व्यवहार देखिन सजिलो भएको लेखे। तर आफूमाथि भएको रंगभेदी टिप्पणीको तस्बिर पनि देख्न चाहेको भन्दै उनले पोस्ट गरेका थिए।
उनले आफूलाई सजाय भए पनि 'उनीहरू लाई के हुन्छ?' भनेर प्रश्न समेत गरे।
नेइमारले रंगभेदी टिप्पणी गरेको आरोप लगाएपछि मार्सेलीका गोन्जालेजले पनि ट्वीटरमार्फत जवाफ फर्काएका छन्। उनले रंगभेदका लागि कुनै पनि स्थान नरहेको बताउँदै दैनीक स्वच्छ प्रतिस्पर्धाका लागि आफू हिडेँको लेखेका छन्।
साथै नेइमारप्रति लक्षित गर्दै 'तिमीले कहिलेकाँही हार्न पनि सिक्नु पर्छ' भनेर गोन्जालेजले लेखेका छन्। उनले महत्वपूर्ण तीन अंक प्राप्त भएकोमा सबैलाई धन्यवाद दिएका छन्।