कोपा अमेरिकाअन्तर्गत बिहीबार विहान सकिएको खेलमा आयोजक ब्राजिलले कोलम्बियाविरुद्ध गरेको बराबरी गोल विवादित बनेको छ।
ब्राजिलले २-१ को जित हात पारेको खेलमा रेफ्रीले नियमविपरित खेलाएको भन्दै कोलम्बियाका खेलाडीले खेलकै दौरान विरोध गरेका थिए।
खेलको ७८ मिनेटमा ब्राजिलका रोबर्टो फिर्मिनोले बराबरी गोल फर्काउनुअघि रेफ्रीले खेल रोक्नु पर्ने भन्दै कोलम्बियाका खेलाडीले तर्क गरेका थिए।
फिर्मिनोले गोल गर्नुअघि बलले रेफ्री नेस्टर पिटानालाई लागेको थियो। नेइमारको प्रहार रेफ्रीलाई लागेर फर्किएपछि ब्राजिलका खेलाडीको खुट्टामा बल पुगेको थियो। त्यसपछि प्राप्त पासमा फिर्मिनोले हेडमार्फत बराबरी गोल फर्काएका थिए।
कोलम्बियाका खेलाडीले विरोध गरे पनि रेफ्रीले गोललाई मान्यता दिएका थिए। १० मिनेट थपिएको इन्जुरी टाइमको अन्तिम मिनेटमा कासेमिरोले अर्को गोल गर्दा ब्राजिलले जित निकालेको थियो।
खेलपछि कोलम्बियाका प्रशिक्षक रेइनाल्डो रेउडाले रेफ्रीको निर्णयले खेलाडीको एकाग्रता भंग भएको बताए।
'ब्राजिलले गरेका दुवै गोल फरक परिस्थितिमा भए। सुरुमा रेफ्रीका कारण खेलाडीको ध्यान भंग भयो,' उनले भने।
दक्षिण अमेरिका फुटबल महासंघको नियमअनुसार रेफ्रीलाई बलले छोएर बल मैदानमै भएको अवस्थामा विपक्षीको पोस्टमा गोलको प्रयास गरेमा वा सिधैं गोल हुने अवस्था भएमा वा एक टिमबाट अर्को टिमले बल पाएमा खेल रोक्नुपर्छ। त्यसपछि ड्रप गर्दै खेल सुचारु गर्ने नियम छ।