स्पेनिस क्लब एट्लेटिको म्याड्रिडका प्रशिक्षक डिएगो सिमोनीले आफ्ना स्टार खेलाडी जुलियन अल्भारेजको सार्वजनिक रूपमा बचाउ गरेका छन्।
भिल्लारियल विरुद्धको खेलमा आफ्नै टोलीका समर्थकहरूले अल्भारेजलाई हुटिङ गरेपछि सिमोनी उनको पक्षमा उभिएका हुन्। अल्भारेज र क्लबबीचको बिग्रँदो सम्बन्धलाई नियाल्दै इंग्लिस क्लब आर्सनल र बार्सिलोना उनलाई अनुबन्ध गर्ने दाउमा लागेका छन्।
विश्वकपका बेला अल्भारेजले बार्सिलोना जानु आफ्नो सपना भएको बताएका थिए। यही भनाइका कारण समर्थकहरू उनीसँग निकै क्रुद्ध छन्।
आइतबारको खेलमा वार्म-अप गर्दा, बेन्चबाट मैदान छिर्दा र खेल सकिएपछि पनि समर्थकहरूले उनलाई चर्को सिठी बजाएर र गिज्याएर अपमान गरे। खेल सकिएपछि अन्य खेलाडी मैदानमै रहँदा अल्भारेज भने एक्लै ड्रेसिङ रुमतिर लागेका थिए।
विवादास्पद माहोलका बीच प्रशिक्षक सिमोनीले समर्थकहरूलाई शान्त रहन र आफ्नो खेलाडीलाई साथ दिन आग्रह गरेका छन्। उनले भने, 'हामीलाई राम्रो स्ट्राइकर चाहिन्छ र उनी हामीसँगै छन्, त्यसैले हामीले उनको ख्याल गर्नुपर्छ। जुलियन हाम्रो टोलीको हिस्सा हुन् र उनी यहाँ रहुन्जेल हामीले उनलाई समर्थन गर्नुपर्छ। यो सबैका लागि असहज परिस्थिति हो, तर सिजनको अन्त्यसम्म सबै कुरा ठीक हुनेछ भन्ने आशा छ।'
एट्लेटिको म्याड्रिडले अल्भारेजको मूल्य १५ करोड युरो तोकेको छ र आफ्नै प्रतिद्वन्द्वी बार्सिलोनालाई नबेच्ने अडान लिएको छ।
तर, स्पेनमा समर्थकहरूको व्यवहारबाट दिक्क भएका अल्भारेजले प्रिमियर लिग फर्कने सोच बनाउन सक्ने अनुमान गरिएको छ। मिकेल आर्टेटाको आर्सनलले यो स्थितिलाई नजिकबाट हेरिरहेको छ र ट्रान्सफर विन्डो बन्द हुनुअघि नै उनलाई भित्र्याउने प्रयास गर्न सक्छ।
