साउदी प्रो लिगमा स्टार खेलाडी क्रिस्टियानो रोनाल्डोलाई हाफ-टाइममै मैदानबाट निकालिएपछि १० खेलाडीमा सीमित अल-नासरले २-० को स्थिति उल्ट्याउँदै अल-एत्तिफाकमाथि रोमाञ्चक जित हात पारेको छ।
मंगलबार भएको खेलमा साविक विजेता अल-नासरको सुरुवात निकै खराब रह्यो। खेलको १२ औँ मिनेटमै गोलकिपर बेन्टोले रातो कार्ड पाएपछि टोली संकटमा पर्यो र पहिलो हाफको अन्त्यसम्ममा २ गोलले पछि रह्यो।
विश्वकपपछिको विश्राम सकेर पहिलो पटक मैदान उत्रिएका ४१ वर्षीय रोनाल्डो पहिलो हाफको प्रदर्शनबाट निकै रुष्ट देखिएका थिए। उनी हतास हुँदै ड्रेसिङ रुम छिरेका थिए, जसका कारण प्रशिक्षक एञ्ज पोस्टेकोलुले उनलाई दोस्रो हाफमा मैदान पठाएनन् र उनको सट्टा अर्को खेलाडीलाई मौका दिए।
प्रशिक्षक पोस्टेकोलुको यो साहसी निर्णय अन्ततः सही सावित भयो। खेल सकिन १३ मिनेट बाँकी रहँदा साडियो माने र अब्दुललेह अल आम्रीले मात्र ३ मिनेटको अन्तरालमा २ गोल गर्दै खेल बराबरीमा ल्याए। त्यसपछि इन्जुरी समयमा मानेले व्यक्तिगत दोस्रो गोल गर्दै अल-नसरलाई ३-२ को पुनरागमन जित दिलाए। यो लगातार तेस्रो जितसँगै अल-नसर लिगको शीर्ष स्थानमा उक्लिएको छ।
आफूलाई मैदानबाट निकालिएपछि रोनाल्डोले बेन्चतर्फ हेर्दै असन्तुष्टि जनाएका थिए। तर, खेलपछि पूर्व टोटनह्याम प्रशिक्षक पोस्टेकोलुले यसलाई रणनीतिक परिवर्तन मात्र भएको बताए। उनले भने, ‘मैले रोनाल्डोसहित अन्य खेलाडी परिवर्तन गर्दा नयाँ आउने खेलाडीले प्रभाव पार्न सक्छन् भन्ने विश्वास थियो। रोनाल्डोले लामो समयदेखि खेलेका थिएनन्, उनले पहिलो हाफमा राम्रो गरे पनि दोस्रो हाफमा हामीलाई फरक रणनीति आवश्यक थियो।’
गत महिना मात्र अल-नसरको जिम्मेवारी सम्हालेका पोस्टेकोलुका लागि यो जित महत्त्वपूर्ण छ। यता, पाँच पटकका बालोन डी'ओर विजेता रोनाल्डोले हालै मात्र आफ्नी प्रेमिका जर्जिना रोड्रिगेजसँग विवाह गरेका छन्। उनले परिवारलाई समय दिनका लागि यो सिजन आफ्नो खेल जीवनकै अन्तिम सिजन हुन सक्ने संकेत समेत दिएका छन्।
